Las novaziuns ch'èn vegnidas introducidas per quest onn en il rom dals examens d'admissiun a la 1. classa dal gimnasi èn sa cumprovadas. Malgrà il grond dumber d'annunzias han ils examens d'admissiun pudì vegnir manads tras senza incaps en tut ils lieus d'examen dal chantun.

Var 480 scolaras e scolars primars èn s'annunziads quest onn en il Grischun per ils examens d'admissiun a la 1. classa dal gimnasi da lunga durada dals 14 da favrer 2012. En cumparegliaziun cun ils onns precedents han ils examens gì lieu circa 3 mais pli baud. Da nov èn las candidatas ed ils candidats vegnids examinads en il rom matematica supplementarmain en il quintar a chau en moda fixada. Ultra da quai è vegnida resguardada en la procedura d'admissiun per l'emprima giada ina segunda lingua chantunala.
Grazia a la buna preparaziun da tut las persunas participadas han ils examens d'admissiun pudì vegnir manads tras senza incaps. Ni il termin pli baud dals examens ni l'examen en quintar a chau en moda fixada e l'integraziun d'ina segunda lingua chantunala han chaschunà midadas impurtantas dal dumber d'admissiuns. Sco gia l'onn passà han tranter 14 % e 15 % da las scolaras e dals scolars da la 6. classa primara gì success als examens d'admissiun. Ils gimnasis da lunga durada pon pia sa legrar da radund 290 novas scolaras e novs scolars da la 1. classa l'onn da scola 2012/13.
Las novaziuns n'èn betg stadas ina sfida mo per las candidatas e per ils candidats e per las persunas d'instrucziun da la 6. classa da las scolas primaras. Er las persunas d'instrucziun, las scolas e las autoritads che han gì l'incumbensa d'organisar e da manar tras ils examens d'admissiun han gì blera lavur. Ils resultats allegraivels dals examens d'admissiun mussan che la refurma da la procedura d'admissiun è sa cumprovada.


Infurmaziuns:
Regina Just Brodbeck, manadra da la partiziun scolas medias / manadra da la gruppa directiva per ils examens d'admissiun chantunals, tel. 081 254 12 34


Gremi: uffizi per la furmaziun media-superiura
Funtauna: rg uffizi per la furmaziun media-superiura