Zum Seiteninhalt

In'emna impurtanta per l'egualitad da las schanzas

  • Erste Mitteilung
  • Neuen Beitrag einfügen
Mesemna, ils 7 da mars 2012, ha lieu il di naziunal d'acziun "Equal Pay Day". El fa attent a l'inegualitad dals salaris ch'exista anc adina tranter ils salaris dals umens e quels da las dunnas. Il mument è la differenza mesauna 18,4 pertschient. Gievgia, ils 8 da mars 2012, vegni pensà a l'egualitad da las schanzas a chaschun dal di internaziunal da la dunna. Durant omadus dis datti acziuns a Cuira.

La differenza tranter ils salaris da las dunnas e quels dals umens è sa sminuida minimalmain ils ultims onns. Las dunnas lavuran en media passa dus mais pli ditg per avair il medem salari sco ils umens a la fin da l'onn. Motivs per quai datti blers: Las dunnas interrumpan lur activitad da gudogn per motivs famigliars bler pli savens ch'ils umens, ils salaris en las professiuns tipicas da dunnas èn en media pli bass che quels en professiuns tipicas dad umens, sco er ils sistems da la valitaziun da lavur ed ils sistems da salari n'èn savens betg neutrals areguard las schlattainas. Dapi l'onn 1996 scumonda la lescha federala davart l'egualitad da dunna ed um discriminaziuns da salari. Il di naziunal d'acziun "Equal Pay Day" fa puspè ina giada attent a quest fatg.

La damaun marvegl dals 7 da mars 2012 offra il club Business&Professional Women (BPW) da Cuira ensemen cun la centrala grischuna da dunnas e cun il post da stab per l'egualitad da las schanzas cornets ed infurmaziuns per pendularias e per pendularis a la staziun da Cuira. Da las 11.00 fin las 14.00 pon ins guardar films davart l'egualitad dals salaris al stan davant il Globus a Cuira, e persunas interessadas pon guardar al computer, sch'ellas survegnan in salari gist (en l'internet sut www.lohnrechner.ch).

Di internaziunal da la dunna
Il di internaziunal da la dunna, ils 8 da mars 2012, fa endament la lunga istorgia da l'egualitad ed appellescha a la solidaritad mundiala cun las dunnas e cun las mattas che pateschan da discriminaziun, da violenza e da guerras. Al museum d'art dal Grischun a Cuira ha lieu da las 12.00 fin las 14.00 in guid da dr. Katharina Ammann tras la collecziun davart il tema "Bilder von Frauen – Frauenbilder". Suenter datti in apero cun spezialitads ord la cuschina da dunnas da differentas culturas. Questa occurrenza vegn organisada da la centrala grischuna da dunnas, da l'agid grischun evangelic a las dunnas, da l'allianza da dunnas Femint, da la societad da dunnas d'utilitad publica dal Grischun e dal moviment ecumenic da las dunnas dal Grischun.

40 onns dretg da votar e d'eleger da las dunnas en il Grischun
Ils 5 da mars 1972, prest exactamain in onn suenter ch'il dretg da votar e d'eleger da las dunnas è vegnì acceptà sin plaun federal, han las Grischunas obtegnì lur dretgs politics er sin plaun chantunal. En cumparegliaziun cun il project federal ch'è vegnì acceptà mo cun 54,7 pertschient da las vuschs, han votà l'onn 1972 72,2 pertschient dals umens Grischuns per l'egualitad politica da las dunnas. Il Grischun è stà il tschintgultim chantun da la Svizra che ha introducì il dretg da votar e d'eleger da las dunnas sin plaun chantunal; suandads èn anc la Sutsilvania e la Sursilvania sco er ils dus Appenzels. L'onn 1973 han per l'emprima giada pudì candidar dunnas per l'elecziun dal cussegl grond. Elegidas èn vegnidas trais da quatter candidatas, numnadamain: Elisabeth Lardelli, Lisa Bener ed Ida Derungs.


Infurmaziuns:
Silvia Hofmann, manadra dal post da stab per l'egualitad da las schanzas dal chantun Grischun, tel. 081 257 35 71, e-mail: Silvia.Hofmann@stagl.gr.ch  


Gremi: post da stab per l'egualitad da las schanzas
Funtauna: rg post da stab per l'egualitad da las schanzas
Neuer Artikel