Cuntegn da la pagina

Communicaziun da la regenza dals 8 da mars 2012

  • Erste Mitteilung
  • Neuen Beitrag einfügen

La regenza grischuna sustegna l'iniziativa parlamentara per abolir l'obligaziun da restituziun dal chantun d'origin. Plinavant è la regenza s'occupada da differentas fatschentas or da las vischnancas e da divers projects da vias.

L'obligaziun da restituziun dal chantun d'origin duai vegnir abolida
En ina consultaziun a la confederaziun prenda la regenza grischuna posiziun davart l'aboliziun da l'obligaziun da restituziun dal chantun d'origin. Il motiv per quai è ina iniziativa parlamentara. Quella pretenda ch'il chantun d'origin na stoppia pajar nagut pli vi da las prestaziuns d'agid social per sias burgaisas e per ses burgais che abitan en in auter chantun. L'obligaziun da restituziun dal chantun d'origin durant ils emprims 2 onns da domicil duai vegnir abolida senza cumpensaziun. La regenza beneventa las intenziuns da l'iniziativa parlamentara. Questa iniziativa tegna quint da l'augment da la mobilitad da la populaziun e reducescha considerablamain la lavur administrativa per il chantun e per las vischnancas.


Da vischnancas e da regiuns

  • Buseno: La regenza augmenta la contribuziun a favur dal project d'infrastructura per la renovaziun totala dal provediment d'aua e d'ina part da la chanalisaziun a maximalmain 704'600 francs. Il project ha stuì vegnir repassà cumplettamain ed adattà suenter las grevas malauras da l'onn 2008.
  • Regiun Partenz: Il plan directiv regiunal concernent il traffic betg motorisà, ch'è vegnì concludì da la corporaziun regiunala pro Partenz ils 16 da november 2010, vegn approvà.


Contribuziuns chantunalas a differentas instituziuns

  • Institut svizzer per entrepreneurship (ISE): Cun la renovaziun da la cunvegna da prestaziun per il center dad IPM da l'institut svizzer per entrepreneurship (ISE) garantescha la regenza per ils onns 2012 fin 2015 ina contribuziun chantunala annuala da 90'000 francs.


Projects da vias
La regenza ha approvà 4'280'000 francs per lavurs da construcziun sin ils suandants trajects:
- H27 via d'Engiadina: lavurs d'impressari e da cuvrida, Ardez – Scuol
- H19 via sursilvana: lavurs d'impressari, Schluein – access da Rueun


Gremi: regenza
Funtauna: rg chanzlia chantunala dal Grischun

Neuer Artikel