Perquai ch'ils resultats da tschertas vischnancas èn vegnids curregids, sto il scrutini da la votaziun dal pievel da dumengia, ils 11 da mars 2012, concernent in credit per la construcziun d'in nov center administrativ chantunal – project "sinergia" vegnir verifitgà d'uffizi. La regenza ha ordinà ina verificaziun dal scrutini.

La lescha davart ils dretgs politics en il chantun Grischun prevesa ina verificaziun d'uffizi, sch'il resultat total eruì provisoricamain a chaschun d'ina votaziun demussa ina differenza tranter las vuschs affirmativas e las vuschs refusantas da main che 0,3 pertschient dals cedels da votar valaivels consegnads. La dumengia da votaziun, ils 11 da mars 2012, ha la chanzlia chantunala dal Grischun pudì communitgar il suandant resultat total provisoric sin basa dals resultats che las 176 vischnancas han transmess electronicamain al chantun concernent in credit per la construcziun d'in nov center administrativ chantunal – project "sinergia": vuschs valaivlas consegnadas 54'335, vuschs gea 27'261, vuschs na 27'074. En cas da la differenza da 187 vuschs e d'ina valur da limita da 163 vuschs (0,3 pertschient da 54'335) n'èn las premissas per ina verificaziun d'uffizi pia betg stadas ademplidas.

Glindesdi, ils 12 da mars 2012, han duas vischnancas communitgà a la chanzlia chantunala ch'ellas hajan curregì lur resultats communals. En la vischnanca da Tavau n'èn 9 vuschs da l'urna da la fracziun da Monstein betg vegnidas resguardadas, perquai che la polizia chantunala che ha fatg il servetsch da curier ha consegnà questas vuschs al biro electoral da Tavau per sbagl pir il glindesdi empè da la dumengia. Da questas 9 vuschs èn resultadas 7 vuschs gea ed 1 vusch na per il project "sinergia". La vischnanca da Donat ha sbaglià ils dus projects chantunals cun registrar electronicamain ils resultats communals. Per il project "sinergia" sa cloma il resultat correct pia 35 vuschs gea cunter 24 vuschs na empè da 57 vuschs gea cunter 2 vuschs na.

Pervia da questas correcturas sa mida il resultat total chantunal concernent il project "sinergia" sco suonda: vuschs valaivlas consegnadas 54'343, vuschs gea 27'246, vuschs na 27'097. La differenza da las vuschs importa da nov anc 149 vuschs, pia main che 0,3 pertschient da las vuschs valaivlas consegnadas (0,3 pertschient da 54'343 = 163,029). Uschia sto il scrutini, sco prescrit en la lescha, vegnir verifitgà d'uffizi.

La regenza ha incumbensà oz la chanzlia chantunala cun la verificaziun. La verificaziun vegn prendida per mauns cur ch'il material da votaziun da las vischnancas è arrivà tar la chanzlia chantunala. Represchentants dal comité refusant han la pussaivladad d'observar la verificaziun. Il resultat vegn communitgà publicamain.


Infurmaziuns:
Walter Frizzoni, vicechancelier, tel. 081 257 22 22


Gremi: regenza
Funtauna: rg chanzlia chantunala dal Grischun