Il cussegl da fundaziun da la fundaziun Stavros S. Niarchos ha examinà er quest onn las dumondas da contribuziun per projects dals secturs cultura, scienza e fatgs socials. Circa 50 projects vegnan sustegnids cun ina contribuziun finanziala.

La fundaziun ch'è vegnida constituida l'onn 2000 ha l'intent da porscher mintga onn in sustegn finanzial a projects en il chantun Grischun sco er ad instituziuns grischunas ch'èn activas sin champs che correspundan a l'intent da la fundaziun. Il cussegl da fundaziun sa cumpona da Philip Niarchos (president), da Spyros Niarchos, d'Alois Jurt, advocat, da Barbara Janom Steiner, presidenta da la regenza dal chantun Grischun, e da Barbara Gabrielli, manadra da l'uffizi da cultura dal Grischun.

Il cussegl da fundaziun sa scuntra mintgamai la primavaira per tractar las dumondas da projects. Er per la sesida da quest onn èn puspè vegnids inoltrads numerus projects interessants ed innovativs. Grazia al grond engaschament da la famiglia Niarchos han circa 50 dals totalmain 139 projects inoltrads pudì vegnir sustegnids cun ina contribuziun finanziala. La fundaziun Stavros S. Niarchos ha ina gronda impurtanza per il chantun Grischun. Cun ses agid pon numnadamain vegnir promovids ulteriurs projects da gronda valur en il chantun.


Infurmaziuns:
Barbara Gabrielli, manadra da l'uffizi da cultura dal chantun Grischun, tel. 081 257 48 01


Gremi: uffizi da cultura
Funtauna: rg uffizi da cultura