Cuntegn da la pagina

Event da "trampolin": Studentas e students sa scuntran cun interpresas dal chantun Grischun

  • Erste Mitteilung
  • Neuen Beitrag einfügen

A l'event da "trampolin" da venderdi, ils 11 da matg 2012, sa scuntran 11 interpresas dal Grischun cun studentas e students da differentas scolas autas. En lavuratoris ed a stans d'infurmaziun preschentan las interpresas lur perspectivas da carriera attractivas e gidan uschia las absolventas ed ils absolvents da scolas autas cun bunas qualificaziuns d'entrar en ina professiun.

A l'event da "trampolin" da venderdi, ils 11 da matg 2012, sa preschentan patrunas e patruns attractivs dal chantun Grischun a las studentas ed als students. En il center da l'occurrenza stat la lavur cuminaivla en lavuratoris che han lieu a la sedia principala da las interpresas che sa participeschan a quest event. Ensemen cun represchentantas e represchentants da las interpresas elavuran las studentas ed ils students ideas innovativas per schliar las sfidas actualas da las interpresas. Uschia han ellas in'occasiun unica da dar in sguard davos las culissas da l'economia grischuna e d'entrar en contact persunal cun persunas-clav da las interpresas. A chaschun da las preschentaziuns da las interpresas che han lieu suenter ils lavuratoris ed als stans d'infurmaziun en il "B12 caffè & bar" a Cuira pon las studentas ed ils students s'infurmar en in'atmosfera libra davart lur perspectivas da carriera.

Organisaziun cun ina vasta basa
L'event da "trampolin" vegn organisà da la together ag per incumbensa da l'uffizi per economia e turissem, da l'uffizi per la furmaziun media-superiura e da la scola auta da tecnica ed economia (SATE) a Cuira ed ha lieu gia per la 6avla giada. La sponsura principala è dapi il cumenzament la banca chantunala grischuna.

La suandantas interpresas sa participeschan a l'event da "trampolin" 2012:

  • Academia Raetica
  • Banca chantunala grischuna
  • Ems-Chemie SA
  • GRITEC High Tech Engineering
  • Hamilton Bonaduz SA 
  • INNOZET 
  • Inventx SA 
  • Repower SA 
  • TRUMPF Maschinen Grüsch SA 
  • Wenzel Metromec SA 
  • Würth International SA

Studentas e students pon anc s'annunziar per l'event da "trampolin" fin mesemna, ils 25 d'avrigl 2012. L'annunzia vegn fatga via www.sprungbrett-events.ch. La participaziun sco er l'alimentaziun è gratuita per las studentas ed ils students.


Infurmaziuns:
Bettina Egger, together ag, tel. 071 222 28 74, e-mail: bettina.egger@together-online.ch  


Gremi: uffizi per economia e turissem
Funtauna: rg uffizi per economia e turissem

Neuer Artikel