Cuntegn da la pagina

Il Grischun festivescha 10 onns dis d'orientaziun per persunas obligadas da far la mustra

  • Erste Mitteilung
  • Neuen Beitrag einfügen
Dapi l'onn 2002 han lieu en il chantun Grischun dis d'orientaziun per persunas ch'èn obligadas da far la mustra. Suenter 10 onns po vegnir tratga ina bilantscha fitg positiva, sco ch'ils responsabels han communitgà oz a Landquart a chaschun d'in di organisà per las autoritads, per giasts e per las medias.

Tgi ch'è infurmà, prenda meglras decisiuns. "Infurmar, instruir e motivar" è perquai er il credo dals dis d'orientaziun che l'uffizi da militar e da protecziun civila dal Grischun (UMPC) organisescha – per incumbensa dal departament da defensiun, protecziun da la populaziun e sport (DDPS) – per giuvenils en il 18avel onn da vita en moda decentrala en il Grischun. Il di d'orientaziun obligatoric duai gidar ils giuvenils a sa preparar cun cleras finamiras per la recrutaziun vegninta. Tge signifitga quai d'esser abel da far servetsch da protecziun civila, co pon ins far servetsch militar senza armas, per tgi è pensà il servetsch civil, quant ditg dura la recrutaziun e tge è la differenza tranter l'infantaria e l'artigliaria? Talas dumondas vegnan scleridas al di d'orientaziun. Quels ch'èn obligads da far la mustra – e natiralmain er dunnas interessadas – vegnan instruids en questa moda e maniera ad ura ed en moda cumplessiva davart l'obligaziun da burgais futura.

Planisar ad ura serva a tuts
Gia per la 10avla giada vegnan preschentads a las persunas obligadas da far la mustra futuras l'armada, il servetsch civil e la protecziun civila a chaschun dals dis d'orientaziun 2012 en il Grischun, e quai a Glion, a Roveredo, a Samedan, a Tusaun, a Landquart ed a Cuira. Oz, al di per las autoritads, per giasts e per las medias a Landquart, han las persunas responsablas tratg in facit fitg positiv. L'experientscha da 10 onns dis d'orientaziun ha mussà ch'ils giuvenils han in grond basegn da vegnir sclerids en moda cumplessiva e ch'els stiman perquai fitg quest di. Ozendi po l'obligaziun da far servetsch vegnir planisada a temp, quai che pussibilitescha er ina meglra coordinaziun cun la professiun e cun purschidas civilas da la furmaziun supplementara.


Infurmaziuns:
- Hans Gasser, schef da l'uffizi da militar e da protecziun civila dal Grischun,
tel. 081 257 35 22
- Jöri Kaufmann, responsabel per ils dis d'orientaziun tar l'uffizi da militar e da protecziun civila dal Grischun, tel. 081 257 35 03


Gremi: uffizi da militar e da protecziun civila dal Grischun
Funtauna: rg uffizi da militar e da protecziun civila
Neuer Artikel