Cuntegn da la pagina

Grischun: Ciclists da muntogna cuntents e generus

  • Erste Mitteilung
  • Neuen Beitrag einfügen
La retschertga ch'è vegnida fatga per incumbensa da grischunBIKE tar ils giasts da velo da muntogna mussa che quels èn fitg cuntents cun la purschida e ch'els recumondan quasi a 100 pertschient gugent il chantun Grischun sco destinaziun da vacanzas. Ciclistas e ciclists da muntogna èn fitg interessants per il turissem da stad, perquai ch'els spendan en media 159 francs al di.

Per il Grischun sco destinaziun da vacanzas èn las ciclistas ed ils ciclists da muntogna ina categoria da giasts che daventa adina pli impurtanta. Enconuschientschas pli precisas da lur giavischs envers il Grischun èn ina basa impurtanta per crear purschidas appreziadas. Tge è impurtant per quests giasts per tscherner lur vacanzas da velo? Cun tge n'èn els betg cuntents tar nus? Questas dumondas ha l'institut per turissem e perscrutaziun dal temp liber da la scola auta da tecnica ed economia (SATE) a Cuira empruvà da sclerir per incumbensa da grischunBIKE cun ina gronda acziun da retschertga en las regiuns centralas da velo da muntogna dal Grischun. Bundant 1500 ciclistas e ciclists da muntogna han respundì las dumondas respectivas durant la stagiun da stad 2011. En in questiunari cumplessiv han ellas ed els pudì communitgar lur preferenzas e formular lur critica. Da princip èn noss giasts fitg cuntents cun il Grischun sco regiun da velo da muntogna. Bel e bain 99 pertschient da las persunas interrogadas vulan schizunt recumandar il Grischun, in resultat fantastic che mussa il potenzial dal Grischun sco paradis per velos da muntogna.
Var 35 % da las persunas interrogadas han inditgà ch'ellas spendian tranter 150 e 219 francs per di, inclusiv l'alloschi, l'alimentaziun ed eventuals meds da transport. Sco media da tut las persunas interrogadas èn vegnids calculads 159 francs. Las ciclistas ed ils ciclists orientads al giudiment èn – cun 173 francs ch'els spendan per di tenor atgnas stimaziuns – la categoria la pli generusa. Questas grondas expensas quotidianas conferman ch'il giast ciclist è ina gruppa en mira economicamain interessanta che po augmentar durablamain la creaziun da valur en il turissem da stad en il Grischun.

La signalisaziun vegn taxada sco fitg impurtanta
Ma co èn las ciclistas ed ils ciclists da muntogna cuntents cun la purschida concreta en il Grischun, respectivamain tge resguardan ellas ed els sco spezialmain impurtant? Tar la purschida da trajects e da turas giuditgeschan las persunas interrogadas en spezial la vista, il gust d'avair cuntanschì il piz e la pussaivladad da pudair contemplar attracziuns, las muntadas e las descensiuns sco er las vias da guaud e las vias champestras sco spezialmain impurtants. Las ciclistas ed ils ciclists da muntogna èn en general cuntents cun la purschida respectiva dal Grischun. Spezialmain dat en egl ch'ellas ed els èn il pli cuntents precis en quels secturs ch'ellas ed els resguardan sco ils pli impurtants.
En cas da l'infrastructura per velos da muntogna e dal material d'infurmaziun èn decisivs per il giast dal Grischun oravant tut ina buna signalisaziun da las rutas sco er chartas da bike e da viandar e chartas topograficas infurmativas. Sco facturs ch'èn er impurtants suondan alura las staziuns da servetsch per reparar l'agen velo da muntogna sco er ina purschida da turas guidadas cun GPS.
La gronda part da las persunas interrogadas è en general cuntenta cun l'infrastructura da bike en l'hotel, cun la purschida da wellness sco er cun ils pasts concepids aposta per sportistas e sportists e cun l'affinitad dal persunal per ciclistas e ciclists da muntogna.
Impurtant per ils giasts è l'agid da transport cun la viafier, cun l'auto da posta e cun las telefericas. Dumandads davart la cuntentientscha cun ils servetschs numnads appreziescha la gronda part da las ciclistas e dals ciclists da muntogna la purschida.
D'in interess spezial per las destinaziuns turisticas è il cumportament d'infurmaziun da las ciclistas e dals ciclists da muntogna. Mintga segund giast ciclist s'infurmescha en l'internet davart il proxim segiurn cun pernottaziun. Uschia è il chanal online cleramain la funtauna d'infurmaziun che vegn duvrada il pli savens. Cun stgars 18 % da las persunas interrogadas suonda sin la segunda plazza la reclama a bucca tras persunas enconuschentas e parentas. Quests dus chanals d'infurmaziun èn cleramain ils pli impurtants, schebain che la dumonda permetteva da dar pliras respostas.

Um, 40 onns, viva en Svizra cun affinitad per l'internet
Bundant dus terzs da las ciclistas e dals ciclists da muntogna interrogads èn umens e 75 % dals giasts vivan en Svizra. Sco motiv il pli impurtant per lur activitad da bike han las persunas interrogadas numnà il plaschair da la cuntrada e da la natira. La sanadad e la fitness sco er l'ir cun velo da muntogna sco eveniment cuminaivel occupan en stretga vischinanza las plazzas 2 e 3. Bler main ciclistas e ciclists da muntogna tschertgan in'aventura sin il velo da muntogna ubain treneschan u sa participeschan ad ina concurrenza. Ina gronda part da las persunas interrogadas sa caracterisescha per gronda part sco orientà a la natira (50,8 %), suandà dad orientà al giudiment (18 %), orientà a la descensiun (vul dir interessà en emprima lingia d'ir engiu) (12,7 %) ed orientà a la concurrenza (9,8 %).
En quai che concerna la durada da la dimora èsi sa mussà che la gronda part da las ciclistas e dals ciclists da muntogna resta 2 fin 3 dis al medem lieu. Las ciclistas ed ils ciclists orientads al giudiment restan cun en media 2,9 dis il pli ditg en in lieu, entant ch'ils auters tips da ciclistas e da ciclists van vinavant suenter 2,4 fin 2,6 dis. Ils megliers giasts èn las ciclistas ed ils ciclists da muntogna orientads a la descensiun. Ellas ed els visitan il Grischun en media 4,7 giadas per stagiun.

L'uffizi chantunal per economia e turissem sco er il post spezialisà per il traffic betg motorisà dal Grischun han lantschà il mars 2010 il project grischunBIKE. Quai cun la finamira da posiziunar il Grischun sco emprima destinaziun en il sectur da velos da muntogna. Cun analisas, cun instrucziuns, cun recumandaziuns e cun lavuratoris duai vegnir stgaffida la basa per ina valurisaziun gronda e persistenta en las destinaziuns turisticas sco er tar ils differents partenaris da servetsch. En quest connex na vegnan er betg negligids ils aspects ecologics ed ils giavischs da las ulteriuras gruppas da persunas che dovran las medemas vias.


Diagrams:
Media dals meters d'autezza per tura
Media dals meters d'autezza per tura: ils umens prefereschan turas da bike pli pretensiusas

Repartiziun tenor vegliadetgna da las ciclistas e dals ciclists da muntogna
Repartiziun tenor vegliadetgna da las ciclistas e dals ciclists da muntogna: procentualmain dapli dunnas giuvnas che umens giuvens van cun velo da muntogna

Ulteriuras activitads da sport da las ciclistas e dals ciclists da muntogna
Ulteriuras activitads da sport da las ciclistas e dals ciclists da muntogna: la gronda part viandescha er e va cun skis


Infurmaziuns:
Peter Stirnimann, responsabel per las medias da l'uffizi da construcziun bassa dal Grischun, 081 257 37 11 / 079 291 72 75


Gremi: uffizi da construcziun bassa dal Grischun
Funtauna: rg uffizi da construcziun bassa dal Grischun
Neuer Artikel