Navigation

Inhaltsbereich

  • Erste Mitteilung
  • Neuen Beitrag einfügen
En il Grischun han 16 bibliotecaras terminà dacurt lur furmaziun supplementara e survegnì il certificat da la cuminanza da lavur da las bibliotecas svizras da lectura publica (CLP).

En las passa 50 bibliotecas da scola e bibliotecas communalas dal chantun vegn prestada ina lavur da biblioteca cumpetenta. Quai cun il sustegn da la biblioteca chantunala dal Grischun, nua ch'i vegnan purschids regularmain perfecziunaments correspundents per persunas creschidas. Quests perfecziunaments adempleschan las prescripziuns da qualitad tenor las directivas vertentas da la cuminanza da lavur da las bibliotecas svizras da lectura publica (CLP). Ils curs vegnan organisads da l'incumbensada chantunala da las bibliotecas Nelly Däscher en num da la cumissiun da biblioteca dal Grischun. Il curs fundamental da la CLP terminescha suenter 27 dis d'instrucziun cun in examen.

Dacurt han 16 absolventas survegnì il certificat da la CLP a chaschun da la festa da finiziun. Il cusseglier guvernativ Martin Jäger, schef dal departament d'educaziun, cultura e protecziun da l'ambient, ha gratulà a las collavuraturas da las bibliotecas da la CLP e las ha ludadas per lur engaschi. Plinavant ha el menziunà ch'ellas possian ussa applitgar lur novas enconuschientschas en lur bibliotecas, ch'èn instituziuns da basa en las vischnancas. I valia la paina da nizzegiar sinergias, da sa preschentar communablamain e da furmar ina rait ensemen cun las autras bibliotecas grischunas. Uschia possian las purschidas ed ils servetschs da las singulas bibliotecas vegnir coordinads optimalmain in cun l'auter.

In certificat han survegnì:
Marianne Brugger, Says; Gemma Clalüna, Champfèr; Snjezana Caviezel, Domat; Elvira Deplazes, Camischolas; Cristina Duca, Roveredo; Amra Hasicic, Panaduz; Sung-Hee Kim, Zizers; Claudia Märchy-Michel, Malans; Claudia Mohr, Walenstadt; Ruth Müller Madlon, Tavau Plaz; Annemarie Rageth, Arosa; Lilian Reichmuth, Lachen; Brigitte Schütz, Lachen; Coni Schweizer, Tavau Wolfgang; Anna von Euw, Malix; Erika Weber, Nossadunnaun


Infurmaziuns:
Elsbeth Bärtsch, biblioteca chantunala dal Grischun, tel. 081 257 28 05, e-mail: elsbeth.baertsch@kbg.gr.ch  


Gremi: biblioteca chantunala dal Grischun
Funtauna: rg biblioteca chantunala dal Grischun
Neuer Artikel