La regenza grischuna ha approvà in project da pilot per coordinar las infurmaziuns d'edifizis. Quest project duai mussar, quanta lavur ch'è necessaria per registrar en il futur las infurmaziuns d'edifizis e co che questas infurmaziuns pon vegnir duvradas da differents posts spezialisads. Ultra da quai ha la regenza prendì positivamain enconuschientscha dal concept per la nova orientaziun da la plazza aviatica da Samedan.

Concludì in project da pilot per duvrar en pliras modas las infurmaziuns d'edifizis
Per incumbensa da la regenza ha in team da project da differents uffizis e posts da servetsch chantunals elavurà in studi davart la coordinaziun da las infurmaziuns d'edifizis. Il studi infurmescha davart la dumonda, co che infurmaziuns d'edifizis pon vegnir registradas, actualisadas e barattadas electronicamain en moda efficazia tranter differents posts communals e chantunals. Actualmain n'èn las infurmaziuns d'edifizis dals differents posts spezialisads federals, chantunals e communals strusch cumparegliablas e colliablas ina cun l'autra u cumparegliablas e colliablas mo cun grondas difficultads. Da nov vegnan edifizis definids en moda unitara e las infurmaziuns respectivas vegnan registradas tenor la medema clav. Uschia pon quellas vegnir colliadas e duvradas electronicamain sur ils secturs professiunals ora.
La lavur per quest project po actualmain mo vegnir presumada cun difficultads. Perquai vegn realisà quest onn in project da pilot cun tut ils edifizis d'abitar e betg d'abitar da trais vischnancas. Davart ina realisaziun da la coordinaziun d'infurmaziuns d'edifizis en tut il chantun Grischun vegn decidì pli tard.

La nova orientaziun da la plazza aviatica da Samedan vegn sustegnida
La regenza ha tractà la nova orientaziun currenta e la segirada da la plazza aviatica regiunala da Samedan. En quest connex ha ella prendì enconuschientscha da las basas legalas e contractualas ch'èn vegnidas elavuradas ils mais passads d'ina gruppa directiva ch'era vegnida nominada per quest intent. Enconuschent èsi che l'infrastructura ed il manaschi da la plazza aviatica duain vegnir separads en il futur. Previs èn ina societad d'infrastructura autonoma da dretg public sut la direcziun dal circul da l'Engiadin'ota ed ina societad da manaschi privata. L'infrastructura e la proprietad funsila duain restar cumplettamain en la proprietad dal maun public. Mo il manaschi aviatic duai vegnir garantì vinavant d'ina societad da manaschi, e quai sin basa d'ina cunvegna da prestaziun sco er en il rom da la concessiun da manaschi valaivla.
La regenza ha da princip ina tenuta positiva envers il concept ch'è vegnì elavurà da la gruppa directiva. Approvada vegn ina cunvegna tranter il chantun e la Engadin Airport SA per concepir da nov las relaziuns giuridicas e l'adempliment da las incumbensas tar la plazza aviatica regiunala da Samedan.
Sco proxim pass vegn questa fatschenta tractada en il cussegl cirquital dal circul da l'Engiadin'ota. Alura suonda quest atun ina votaziun dal pievel en il circul da l'Engiadin'ota. Sche quest project da votaziun vegn acceptà da las votantas e dals votants dal circul da l'Engiadin'ota, vegn la regenza a deliberar ina missiva per mauns dal cussegl grond. Atgnamain èsi previs che la nova interpresa d'infrastructura possia cumenzar cun sia activitad operativa il cumenzament da l'onn 2014.

Refusà il recurs cunter l'urden da traffic da San Murezzan
La regenza grischuna ha refusà in recurs da diversas interpresas da taxi da San Murezzan cunter l'urden da traffic da la vischnanca. L'urden da traffic ch'è vegnì disponì da la suprastanza communala da San Murezzan l'avust 2011 cuntegna tranter auter ina reducziun da las plazzas stablas per taxis sin la Plazza da la Posta Veglia tar la rundella dal Steffani. Da nov duain star a disposiziun mo pli ina plazza stabla per taxis durant il di e – sco enfin ussa – duas plazzas durant la notg sin la Plazza da la Posta Veglia. Las interpresas da taxi recurrentas han pretendì per differents motivs (tranter auter intervenziun en la libertad economica e da concurrenza sco er insupportabladad) l'aboliziun da quest urden.
Per la regenza è l'urden da traffic da la vischnanca admissibel, proporziunal ed indispensabel ord vista da la segirezza dal traffic. Ultra da quai è la mesira durant il di ina facilitaziun ed in meglierament per il traffic e per l'access a la zona locala da pedunas e da peduns. Da l'autra vart n'han ils recurrents betg savì far valair interess persvadents che avessan giustifitgà da mantegnair la segunda plazza stabla da 24 uras per taxis sin la Plazza da la Posta Veglia.

La revisiun parziala da la lescha da vischnancas entra en vigur il 1. da fanadur 2012
En il rom da la refurma da vischnancas (project parzial "vischnancas burgaisas") ha il cussegl grond concludì en la sessiun da favrer 2012 ina revisiun parziala da la lescha da vischnancas. Cunter questa revisiun da la lescha n'èsi betg vegnì fatg in referendum. Cun il conclus da la regenza entra la revisiun parziala da la lescha da vischnancas en vigur il 1. da fanadur 2012.


Da vischnancas e da regiuns 

• Glion: La revisiun parziala da la planisaziun locala da la citad da Glion dals 7 d'october 2011 vegn approvada. Cun la revisiun parziala vegnan stgaffidas las premissas per il svilup architectonic dal territori da la staziun e dal center. Per il terminal d'autos da posta planisà, per la plazza da la staziun e per las surfatschas d'avertura vegn determinada ina zona per edifizis e per stabiliments publics. L'areal "Maissen" vegn mess da la zona da mastergn e da servetschs en la zona centrala. Ultra da quai vegn realisada ina nova via da rimnada che duai garantir l'avertura dal territori "Pendas". 
• Tavau: Il cussegl grond da la vischnanca da Tavau ha concludì ils 30 da zercladur 2011 ina revisiun parziala da la planisaziun locala che cumpiglia in plan general d'avertura 1:1000 "spazi d'auas". Las parts dal plan "Schiabach" sco er "Schatzalpbächli" dal plan general d'avertura vegnan approvadas anticipadamain. La decisiun areguard il plan en general sco er concernent in recurs da planisaziun ch'è vegnì inoltrà e davart la posiziun d'ina organisaziun da la protecziun da l'ambient vegn prendida pli tard. 
• Pratval: La revisiun parziala da la constituziun communala da la vischnanca da Pratval dals 14 da matg 2012 vegn approvada. 
• Savognin: A la vischnanca da Savognin vegn garantida ina contribuziun chantunala da maximalmain 423 225 francs vi dals custs da construcziun per amplifitgar la via champestra nr. 46, Veia d'Alp, traject kilometer 2,56 fin 4,84. Premessa vegn la participaziun federala correspundenta.

Gremi: regenza
Funtauna: rg chanzlia chantunala dal Grischun