Navigation

Inhaltsbereich

  • Erste Mitteilung
  • Neuen Beitrag einfügen
La cumissiun per sanadad e fatgs socials ha predeliberà la missiva da la regenza tar la revisiun parziala da la lescha davart ils supplements da famiglia per mauns dal cussegl grond. Ella recumonda al cussegl grond d'acceptar la revisiun parziala.

Sut il presidi da la deputada Gabriela Tomaschett-Berther ha la cumissiun per sanadad e fatgs socials concludì da proponer al cussegl grond d'acceptar la revisiun parziala da la lescha davart ils supplements da famiglia (LSF). A la sesida èn er sa participads il cusseglier guvernativ Hansjörg Trachsel ed il directur da l'institut d'assicuranza sociala Carl Hassler.
La missiva da la regenza tar la revisiun parziala da la LSF pertutga la realisaziun da las midadas da la lescha federala davart ils supplements da famiglia (LSFam) ch'èn vegnidas concludidas sin plaun federal e ch'entran en vigur per il 1. da schaner 2013. Sa basond sin l'iniziativa parlamentara "In uffant, in supplement" han las chombras federalas extendì il champ d'applicaziun da la LSFam er sin las persunas cun activitad da gudogn independenta ordaifer l'agricultura.
La cumissiun ha approvà il project elavurà da la regenza e propona al cussegl grond d'entrar en la materia e d'acceptar la revisiun parziala. Duas propostas da minoritad, fatgas en la cumissiun, concernan d'ina vart l'autezza dals supplements per uffants (inclusiv in'adattaziun a la chareschia) e da l'autra vart la pussaivladad per las cassas da cumpensaziun per famiglias d'incassar differentas tariffas da contribuziun per lavurantas e lavurants e per persunas cun activitad da gudogn independenta. La missiva prevesa percunter ina tariffa unitara.
Il cussegl grond vegn a tractar la revisiun parziala da la LSF en la sessiun d'avust 2012.


Infurmaziuns:
presidenta da la cumissiun Gabriela Tomaschett-Berther, tel. 081 920 22 22


Gremi: cumissiun per sanadad e fatgs socials
Funtauna: rg cumissiun per sanadad e fatgs socials
Neuer Artikel