Cuntegn da la pagina

Il Grischun essan nus – la presidenta da la regenza tranter nus

  • Erste Mitteilung
  • Neuen Beitrag einfügen
Tge vulevas Vus gia adina mussar u dir a la regenza grischuna? Envidai la presidenta da la regenza Barbara Janom Steiner ad ina visita. En mintga regiun linguistica dal chantun han lieu il settember e l'october 2012 dis da scuntrada che vegnan arranschads tenor las propostas da la populaziun.

Durant ses onn presidial vul la presidenta da la regenza Barbara Janom Steiner tgirar il contact cun la populaziun grischuna en tut las trais regiuns linguisticas dal chantun. I duai dar in barat avert e direct en il rom da scuntradas persunalas.
Per quest intent retschaiva la presidenta da la regenza gugent propostas da la populaziun: persunas interessadas èn envidadas d'inoltrar propostas per ina scuntrada. En mintga regiun linguistica (Grischun rumantsch, tudestg e talian) è previs il settember e l'october 2012 almain in di da visita cun la presidenta da la regenza. Barbara Janom Steiner vegn a selecziunar sezza las propostas da la populaziun.

Propostas originalas èn giavischadas. Da resguardar è che las visitas èn publicas e che la populaziun sto avair la pussaivladad da sa participar a las visitas. Ils eventuals temas duain plinavant esser d'in interess general. La finamira da las visitas èn scuntradas en tut las trais regiuns linguisticas dal chantun che laschan enavos impressiuns durablas e che pon forsa er furnir enconuschientschas novas e nunspetgadas. Il motto da la retscha da scuntradas sa cloma:

Il Grischun essan nus – la presidenta da la regenza tranter nus
Graubünden sind wir – die Regierungspräsidentin unter uns
I Grigioni siamo noi: la presidente del Governo tra noi

Las ideas pon vegnir inoltradas a partir dal proxim glindesdi, ils 13 d'avust 2012, fin glindesdi, ils 27 d'avust 2012, sur l'internet (www.gr.ch) u al departament da finanzas e vischnancas dal Grischun che organisescha las visitas.

Per posta:
Departament da finanzas e vischnancas dal Grischun
Secretariat
Chavazzin "Il Grischun essan nus"
Rosenweg 4
7000 Cuira 

Per e-mail:
info@dfg.gr.ch  
Object: "Il Grischun essan nus" 

Sur l'internet: inoltrai qua Vossas propostas


Infurmaziuns:
presidenta da la regenza Barbara Janom Steiner, scheffa dal departament da finanzas e vischnancas, tel. 081 257 32 01, barbara.janom@dfg.gr.ch  


Gremi: departament da finanzas e vischnancas
Funtauna: rg departament da finanzas e vischnancas
Neuer Artikel