Navigation

Inhaltsbereich

  • Erste Mitteilung
  • Neuen Beitrag einfügen
A partir da l'onn da scola 2012/13 vegn realisà il model 1+1 sin il stgalim superiur da la scola populara dal Grischun. Las baselgias chantunalas dattan mo pli ina lecziun da religiun, da nov vegn dentant introducida ina lecziun "enconuschientscha da las religiuns ed etica".

Fin ussa devan las baselgias chantunalas da dretg public renconuschidas a las scolaras ed als scolars respectivs da la scola populara duas lecziuns da religiun. A chaschun da la votaziun dals 17 da matg 2009 (iniziativa d'etica) è il pievel grischun s'exprimì per la cuntraproposta dal cussegl grond ch'è er vegnida sustegnida da las baselgias chantunalas. La decisiun dal pievel prevesa che las baselgias chantunalas dettian a las scolaras ed als scolars ch'èn commembers d'ina da las duas baselgias chantunalas ed a talas e tals che vulan far part da quellas mo pli ina lecziun da religiun. Persuenter vegn introducida ina lecziun "enconuschientscha da las religiuns ed etica" che sto vegnir frequentada obligatoricamain da tut las scolaras e da tut ils scolars da la scola populara. Uschia è l'instrucziun da religiun concepida da nov tenor il model 1+1.
Suenter ina fasa d'elavuraziun dal plan d'instrucziun e suenter la qualificaziun posteriura da las persunas d'instrucziun suonda ussa per l'onn da scola 2012/13 la realisaziun da quest model sin il stgalim superiur da la scola populara. La midada vegn fatga successivamain, uschia ch'igl è pertutgada mintgamai ina classa supplementara per onn, cumenzond cun l'emprima classa dal stgalim superiur. La fin da l'onn da scola 2014/15 vegn la midada sin il stgalim secundar I ad esser terminada.
Cura ch'il plan d'instrucziun 21 è avant maun, duai il model 1+1 vegnir introducì pli tard er sin il stgalim primar, resguardond las experientschas ch'èn vegnidas fatgas sin il stgalim superiur.

Enconuschientscha da las religiuns ed etica
Cun "enconuschientscha da las religiuns ed etica" vegn introducì in nov rom, per il qual è responsabel il chantun. En vista a l'introducziun da quest nov rom vegn realisada ina qualificaziun posteriura per las persunas d'instrucziun en furma d'in perfecziunament che dura duas emnas. La qualificaziun posteriura vegn purschida dapi l'onn 2011 e fin l'onn 2014. Tenor il stadi actual da la qualificaziun posteriura pon ins far quint che las instituziuns ch'èn responsablas per la scola hajan avunda persunas d'instrucziun per il rom "enconuschientscha da las religiuns ed etica".
Tenor il plan d'instrucziun ha il rom la finamira da promover la cumpetenza da sa fatschentar cun dumondas da l'etica, cun differentas tradiziuns religiusas e cun diversas valurs en il senn d'ina convivenza paschaivla plain responsabladad. La dimensiun da l'enconuschientscha da las religiuns duai intermediar enconuschientschas davart la religiun or d'ina perspectiva externa (cuntrari a l'instrucziun da religiun che vegn chapida sco furmaziun religiusa or d'ina perspectiva interna) e promover la cumpetenza interculturala da sa fatschentar cun differentas religiuns ed ideologias. La dimensiun etica dal rom vul percunter cunzunt promover la cumpetenza da giuditgar e d'agir en moda etica.


Infurmaziuns:
cusseglier guvernativ Martin Jäger, schef dal departament d'educaziun, cultura e protecziun da l'ambient, tel. 081 257 27 01


Gremi: Departament d'educaziun, cultura e protecziun da l'ambient dal Grischun
Funtauna: rg Departament d'educaziun, cultura e protecziun da l'ambient dal Grischun
Neuer Artikel