Per la sanaziun totala da la chasa Cleric da la scola chantunala grischuna a Cuira ha gì lieu ina concurrenza d'art a l'edifizi. Cun ses project "Glasperlenspiel" e "Partitur des Ursprungs" ha l'artist Remo Albert Alig da Flem Vitg gudagnà la concurrenza.
Ultra da l'architectura duai er l'art dar impuls per pensar e per agir en moda creativa. L'art a l'edifizi vul promover la chapientscha da l'art tar in vast circul d'utilisadras e d'utilisaders e sustegnair tendenzas artisticas e concepziuns modernas. Quest aspect survegn er ina gronda impurtanza en la nova scola chantunala. L'art sa manifestescha evidentamain en lieus neuralgics e permetta uschia interpretaziuns. El duai promover daletg visual, dar blers impuls e permetter intginas experientschas.
Cun la concurrenza d'art per la chasa Cleric ch'è vegnida realisada duai vegnir cuntiunà cun questa tradiziun. Las suandantas artistas ed ils suandants artists èn vegnids envidads da sa participar: Remo Albert Alig, Flem Vitg ("Glasperlenspiel" e "Partitur des Ursprungs"); Gregori Bezzola, Arlesheim ("Boden", "Berg", "Aquarium"); Arno Hassler / Daniela Keiser, Turitg ("Gebilde"); Ursula Palla, Turitg ("à l'heure", installaziun da video) e Michel Pfister, Basilea ("Das kreative Potential").
La giuria che sa cumpona da sis persunas ha tschernì da las tschintg propostas unanimamain il sboz da l'artist Remo Albert Alig. Cun in concept general intelligent, cumplex ed analitic ch'è ponderà consequentamain e detagliadamain ha sia proposta persvadì la giuria en tut ils reguards. La giuria è da l'avis ch'il project saja fitg autentic, persistent e persvadent tant concernent la furma, il material e l'architectura sco er concernent il cuntegn.
Tut ils projects da la concurrenza che vegnan undrads detagliadamain en il rapport da la giuria vegnan exponids publicamain dals 20 fin ils 31 d'avust 2012, mintgamai il glindesdi fin il venderdi, da las 07.00 a las 18.00, en il foyer dal plaunterren al tract spezial/a l'aula da la chasa Cleric sanada, Plessurquai 63, 7000 Cuira. L'ovra d'art vegn realisada durant las vacanzas d'atun da la scola chantunala grischuna. L'avertura uffiziala / il di da las portas avertas da la sanaziun totala Cleric ha lieu ils 10 da november 2012.
Infurmaziun:
Il rapport da la giuria pon ins consultar en l'internet sut
www.hochbauamt.gr.ch.
Agiunta:
Fotomontaschas da "Glasperlenspiel" e da "Partitur des Ursprungs":
Infurmaziuns:
Markus Dünner, architect chantunal, uffizi da construcziun auta dal Grischun, tel. 081 257 36 31
Gremi: uffizi da construcziun auta dal Grischun
Funtauna: rg uffizi da construcziun auta dal Grischun