Navigaziun principala

Cuntegn da la pagina

La cumissiun ha tractà il rapport davart la politica d'electricitad

  • Erste Mitteilung
  • Neuen Beitrag einfügen
La cumissiun dal cussegl grond per ambient, traffic ed energia sustegna da princip il rapport da la regenza davart la politica d'electricitad dal chantun Grischun.

La cumissiun per ambient, traffic ed energia ha predeliberà il rapport davart la politica d'electricitad dal chantun Grischun en vista a la sessiun d'avust 2012. Durant pliras sesidas ha la cumissiun tractà intensivamain las strategias e las finamiras proponidas da la regenza per la politica d'energia. La cumissiun è sa radunada sut il presidi dal president Simi Valär ed en preschientscha dal cusseglier guvernativ Mario Cavigelli. Davart il management da las ristgas è ella sa laschada infurmar separadamain da Kurt Bobst, il CEO da la Repower SA.

Il rapport mussa tge midadas ch'igl ha dà sco er tge potenzials e tge pussaivladads d'agir ch'i dat en il sectur da l'electricitad. En il rapport èn formuladas las strategias e las finamiras per la politica d'electricitad. Detagliadamain tracta il rapport il sectur da la forza idraulica ch'è – ord vista da la cumissiun – impurtant per l'economia publica. En in'atgna decleraziun davart las strategias exprima la cumissiun la speranza che la regenza s'engaschia tar la confederaziun, per che la suveranitad da las auas restia sco quai ch'ella è e per che las proceduras da permissiun vegnian simplifitgadas tant sco pussaivel per ovras idraulicas sco er per implants da vent e da fotovoltaica. En quai che reguarda las finamiras da la producziun d'electricitad en grondas ovras idraulicas, la producziun d'electricitad ord energias regenerablas, il commerzi e la vendita, l'effizienza en il sectur da l'electricitad, il return dals implants ed il nov concessiunament sco er l'imposiziun da taglia sin ovras partenarias propona la cumissiun al cussegl grond da far atgnas decleraziuns e da formular en quellas la speranza ch'il chantun e las vischnancas involvian mintgamai a temp in l'auter en las tractativas. Er duai il chantun examinar en il cas singul ina participaziun resp. ina participaziun da maioritad dal maun public.

La cumissiun propona al cussegl grond d'entrar en il rapport e da prender enconuschientscha da tal cun las decleraziuns ch'ella ha fatg.


Infurmaziuns:
Simi Valär, president da la cumissiun, tel. 076 503 70 76


Gremi: cumissiun per ambient, traffic ed energia
Funtauna: rg cumissiun per ambient, traffic ed energia
Neuer Artikel