Cuntegn da la pagina

Renovà la basa da mantegniment a Surava

  • Erste Mitteilung
  • Neuen Beitrag einfügen
Venderdi, ils 24 d'avust 2012, vegn averta uffizialmain a Surava la basa da mantegniment da l'uffizi da construcziun bassa, district 5 Tavau, ch'è vegnida sanada ed engrondida. Entaifer in onn èn las localitads vegnidas adattadas architectonicamain ed engrondidas adequatamain.

Il district 5 da l'uffizi da construcziun bassa tgira ina rait da vias da 248 kilometers. Quella cumpiglia tut il Partenz e tut sias vals lateralas sco er la vart da nord dal pass dal Flüela. La Val dal Landwasser sco er la Val d'Alvra fin a Preda appartegnan er al champ da cumpetenza da quest district. Cun questa rait da vias gronda e pretensiusa è il district 5 Tavau il terz grond district da l'uffizi da construcziun bassa. Da la basa da mantegniment a Surava anora garanteschan tschintg collavuraturs il mantegniment architectonic e manaschial da la via dal Landwasser, da la via da l'Alvra e da la via da Bravuogn cun tut lur vias lateralas.
La situaziun da las localitads d'enfin ussa na pudeva lunschor betg satisfar a las pretensiuns actualas envers in mantegniment modern da las vias. La collocaziun en differents edifizis maladattads engrevgiava il manaschi da mantegniment da la rait da vias. Localitads per parcar ils vehichels mancavan per gronda part, uschia che quels han stuì vegnir laschads ora en il liber. Material ed iseglia vegnivan depositads en sustas improvisadas. Per il persunal da mantegniment stevan a disposiziun mo localitads da segiurn e gardarobas simplas.

Nova basa per la lavur quotidiana
L'edifizi da la basa actuala en la vischnanca da Surava ha pudì vegnir engrondì ed adattà al manaschi. Sa basond sin il concept da manaschi e sin il program da spazi da l'uffizi da construcziun bassa è vegnì planisà in edifizi da lain simpel, ma cunvegnent.
Las lavurs da construcziun èn vegnidas prendidas per mauns l'atun 2010 ed han pudì vegnir terminadas la primavaira 2011, uschia che l'edifizi ha pudì vegnir mess en funcziun per quel termin. La halla da parcar per ils vehichels, las localitads da deposit sco er ils locals da segiurn e la gardaroba per ils collavuraturs èn ussa unids sut in tetg. L'edifizi da la basa da mantegniment è vegnì construì en ina moda funcziunala e durabla ed è caracterisà d'ina clera architectura. El correspunda a las pretensiuns actualas envers ina basa principala e sustegna ils collavuraturs tar lur lavur quotidiana sin via.


Avis:
Las collavuraturas ed ils collavuraturs da las medias èn envidads a la festa d'avertura da venderdi, ils 24 d'avust 2012, a las 16.00, a la quala er il cusseglier guvernativ dr. Mario Cavigelli è preschent. La festa ha lieu a Surava a la via da l'Alvra en la basa da mantegniment da l'uffizi da construcziun bassa.


Infurmaziuns:
- Markus Dünner, architect chantunal, uffizi da construcziun auta, tel. 081 257 36 31
- Reto Knuchel, schef dal mantegniment da vias, uffizi da construcziun bassa, tel. 081 257 37 35


Gremi: uffizi da construcziun auta dal Grischun
Funtauna: rg uffizi da construcziun auta dal Grischun
Neuer Artikel