Ils dis europeics dal monument, che han lieu ils 8 e 9 da settember en Bregaglia, porschan a las visitadras ed als visitaders in program multifar davart il tema "crap e betun".

En il center dals dis europeics dal monument che han lieu per la 19avla giada stattan ils materials crap e betun. La tgira chantunala da monuments, la protecziun da la patria dal Grischun e sia secziun da l'Engiadina e da las vals dal sid han mess en pè in program varià davart il tema en Bregaglia. Las visitadras ed ils visitaders vegnan manads ad ovras da construcziun che han funcziuns fitg differentas e che derivan da differentas epocas: baselgias da temp roman e gotic tardiv, construcziuns da defensiun dal temp autmedieval, villas e palazis barocs, chasas burgaisas dal 19avel tschientaner, chasas purilas simplas ed edifizis d'utilisaziun rurala, chasas d'abitar dal preschent e da la moderna sco er prestaziuns excellentas da la tecnica d'inschigneria sco il mir da fermada d'Albigna.

Ils dis europeics dal monument vegnan averts uffizialmain sonda, ils 8 da settember a las 13.15 sin la Piazza a Soglio da Martin Jäger, schef dal departament d'educaziun, cultura e protecziun da l'ambient, dad Anna Giacometti, presidenta communala da la vischnanca da Bregaglia, dad Andreas Weisstanner, president da la protecziun da la patria, secziun da l'Engiadina e da las vals dal sid, sco er da Giovanni F. Menghini, tgirader chantunal da monuments. Alura preschenta Inge Beckel, presidenta da la protecziun da la patria dal Grischun, il nov guid "Architekturrundgang Bergell".

Guids vegnan organisads sonda, ils 8 da settember, tranter las 14.00 e las 18.00 a Soglio, sco er dumengia, ils 9 da settember, da las 10.30 a las 15.00 en differents lieus da la val. Il program detaglià è publitgà en l'internet sut www.denkmalpflege.gr.ch, www.heimatschutz-gr.ch e www.hereinspaziert.ch.

Per in vast public
Dapi sia emprima realisaziun l'onn 1994 èn ils dis europeics dal monument sa sviluppads a l'occurrenza la pli gronda en il sectur da la tgira da monuments. La finamira da questa occurrenza è quella da sensibilisar in vast public per il mantegniment da bains culturals. Las visitas vegnan organisadas en emprima lingia dals posts spezialisads federals, chantunals e municipals per la tgira da monuments e per l'archeologia. Els tschernan mintga onn ils objects, contacteschan las proprietarias ed ils proprietaris ed organiseschan ils guids e las occurrenzas al lieu.

Il center naziunal d'infurmaziun per il mantegniment dals bains culturals (NIKE) è responsabel per la coordinaziun da las var 200 occurrenzas en l'entira Svizra, per la lavur naziunala da medias e da publicitad sco er per la publicaziun dal program en furma da broschura ed en l'internet. Il di europeic dal monument è ina manifestaziun culturala che vegn lantschada uffizialmain dal cussegl da l'Europa. L'iniziativa vegn er sustegnida da l'Uniun europeica. Il di dal monument ha lieu en 48 pajais europeics.


Infurmaziuns:
Marlene Fasciati, tgira da monuments dal Grischun, tel. 081 257 27 89
marlene.fasciati@dpg.gr.ch  

Gremi: uffizi da cultura
Funtauna: rg uffizi da cultura