Per la fin da l'onn 2011 aveva il chantun Grischun ina populaziun residenta permanenta da 193 388 persunas, 767 dapli che l'onn avant. La leva creschientscha è d'attribuir exclusivamain a l'augment da la populaziun residenta estra. Ultra da quai po il Grischun registrar per l'emprima giada dapi 7 onns puspè in saldo positiv da las naschientschas.
La populaziun residenta svizra stagnescha, il dumber da persunas estras crescha
La populaziun residenta permanenta dal Grischun è creschida l'onn passà per 0,4 % sin 193 388 persunas. La rata da creschientscha correspunda exactamain al nivel da l'onn precedent e circa a la media dals ultims onns. En Svizra è la populaziun sa sviluppada en moda pli dinamica er l'onn 2011 (creschientscha da var 1,1 %).
Entant che la populaziun residenta svizra è puspè stagnada l'onn passà en il Grischun, è il dumber da persunas da naziunalitad estra creschì per 2,4 % sin 32 884 persunas. Quai correspunda ad ina quota da persunas estras da 17,0 % (Svizra: 22,8 %). La quota la pli gronda da la populaziun estra en il Grischun han da nov ils Portugais (24,7 %) che han stuschà sin plazza dus la gruppa dals Tudestgs ch'è creschida mo levamain. Alura suondan, sco ils onns precedents, las gruppas dals Talians, dals Serbs e dals Austriacs.
Differenzas regiunalas pli grondas oravant tut en la cumparegliaziun da plirs onns
Il svilup da la populaziun entaifer il Grischun n'è betg regular: la creschientscha da la populaziun la pli gronda hai dà l'onn 2011 en las regiuns da la Mesolcina (+1,9 %) e dal Puschlav (+1,6 %) sco er da l'Engiadin'ota (+1,1 %). Las perditas procentualas las pli grondas han subì la Val Müstair (-2,5 %) sco er las regiuns da la Bregaglia (-1,1 %) e dal Grischun central (-0,8 %).
Populaziun residenta permanenta ils 31 da december 2011 tenor regiuns
Funtauna: UST (STATPOP 2011)
Contemplà sur ina perioda pli lunga è la populaziun dal Grischun creschida dapi l'onn 2001 per tut en tut 4,4 % (Svizra: 9,6 %). En la part dal nord dal Grischun, en l'Engiadin'ota e bassa sco er en la Mesolcina èn vegnids registrads ils augments ils pli gronds, entant che la mesadad da las regiuns han subì perditas tar la populaziun.
Midada da la populaziun residenta permanenta tenor regiuns, 2001–2011
Funtauna: UST (ESPOP 2001/STATPOP 2011)
Adina dapli Grischunas e Grischuns vivan en vischnancas pli grondas
57,3 % da tut las vischnancas grischunas avevan l'onn 2011 main che 500 abitantas ed abitants; en questas vischnancas pitschnas vivan tut en tut però mo pli 11,4 % da la populaziun residenta permanenta. Il process da concentraziun sin las vischnancas pli grondas cuntinuescha.
Funtauna: UST (STATPOP 2011)
Dapli naschientschas che mortoris
L'onn 2011 ha il dumber da naschientschas d'uffants vivs en il Grischun (1724) surpassà per l'emprima giada dapi 7 onns puspè il dumber da mortoris (1614), e quai gist cleramain. Sco consequenza dal svilup general da la populaziun ed en spezial da l'immigraziun creschenta, chatta il lev trend da dapli naschientschas sia cuntinuaziun er en il Grischun, schebain sin in nivel plitgunsch modest cumpareglià cun ils auters chantuns da la Svizra.
Mintga 5avel uffant che nascha en il Grischun ha ina naziunalitad estra, entant che la quota da persunas estras tar ils mortoris sa chatta tar bass 6,5 % – l'immigraziun pli ferma dals ultims onns procura per ina regiuvinaziun demografica da la societad.
La quota da naschientschas ordaifer ina lètg sa chatta cun var 19 % en il rom da l'onn precedent. Durant ils ultims 10 onns è questa quota tuttina quasi sa redublada, sa chatta però, sco en tut la Svizra, anc adina cleramain sut la media da l'Uniun europeica (2010: 37 %).
Plinavant èn vegnidas serradas l'onn passà 1018 lètgs e vegnids inscrits 6 partenadis registrads.
Resultats detagliads da la statistica da la populaziun stattan a disposiziun sin la pagina d'internet da l'uffizi per economia e turissem sut
www.awt.gr.ch/statistik.
Infurmaziuns:
Patrick Casanova, uffizi per economia e turissem dal Grischun (UET), tel. 081 257 23 74
Gremi: uffizi per economia e turissem
Funtauna: rg uffizi per economia e turissem