La lescha davart las scolas popularas dal chantun Grischun (lescha da scola) entra en vigur per il 1 d'avust 2013, però senza la disposiziun davart il dumber d'emnas da scola. Tar la nova lescha da scola ha la regenza grischuna relaschà in'ordinaziun.

Ils 21 da mars 2012 ha il cussegl grond approvà la revisiun totala da la lescha davart las scolas popularas dal chantun Grischun (lescha da scola). Tenor la lescha importa il temp da scola annual da nov 39 empè da sco fin ussa 38 emnas da scola. La regenza ha concludì da metter en vigur la lescha da scola per il 1. d'avust 2013 cun excepziun da l'alinea respectiv da l'artitgel 24. Quest alinea duai entrar en vigur pir, cur ch'il nov plan d'instrucziun 21 – elavurà interchantunalmain – vegn deliberà dal chantun Grischun per la realisaziun e cur ch'ils uraris che sa basan sin tal en sviluppads ed approvads.

Ils uraris actuals cun lur dotaziuns da lecziuns per rom sa chattan en la cumparegliaziun interchantunala – almain per il stgalim primar – sur la media. Pir cur che la dotaziun da lecziuns per scolara e scolar per emna da scola po vegnir reducida, po in'extensiun da l'instrucziun annuala da 38 a 39 emnas da scola vegnir acceptada. Quai vegn ad esser il cas il pli baud l'onn da scola 2016/17.

L'ordinaziun da scola concretisescha las disposiziuns legalas
Er per il cumenzament dal proxim onn da scola entra en vigur l'ordinaziun da la regenza tar la lescha da scola (ordinaziun da scola). En questa ordinaziun èn unidas disposiziuns da 18 differentas ordinaziuns vertentas. Per gronda part vegnan surpigliadas en quest connex las regulaziuns vertentas. Las disposiziuns davart las purschidas da tgira d'uffants cumplementaras a la scola (structuras dal di) n'èn betg vegnidas surpigliadas en la nova ordinaziun da scola. Quellas duain vegnir relaschadas pli tard.

En l'ordinaziun da scola vegnan reglads tranter auter ils suandants puncts:

• Tenor la nova lescha da scola ha la regenza da nov la cumpetenza da fixar ils roms obligatorics, ils roms d'elecziun ed ils roms d'elecziun obligatorics. In'excepziun furman l'instrucziun da linguas e las regulaziuns spezialas concernent il rom religiun che vegnan fixadas sco fin ussa sin il stgalim da la lescha. L'enumeraziun dals roms obligatorics da la scola primara cuntinuescha cun la regulaziun vertenta e resguarda il rom englais ch'è vegnì introducì da nov cun ina decisiun dal pievel.
• Scolas che vulan fixar duas linguas sco linguas da scola per promover las linguas chantunalas rumantsch e talian pon far quai sin dumonda cun ina permissiun da la regenza. Ordavant sto vegnir mussà cun in concept che las linguas vegnan resguardadas en ina relaziun equilibrada.
• Per meds d'instrucziun che vegnan duvrads probablamain da main che 500 scolaras e scolars pon vegnir realisadas soluziuns pli favuraivlas.
• Il grad d'occupaziun minimal d'ina direcziun da la scola è vegnì reducì dad actualmain 30 a 20 pertschient da plazzas. Uschia pon er scolas pitschnas installar ina direcziun da la scola resp. survegnir contribuziuns chantunalas.
• Per sustegnair en scola uffants cun basegns spezials stattan a disposiziun differentas purschidas da scolaziun e da promoziun simplas e pretensiusas. Quellas vegnan numnadas en la nova ordinaziun e lur applicaziun vegn precisada.

Infurmaziuns:
cusseglier guvernativ Martin Jäger, schef dal departament d'educaziun, cultura e protecziun da l'ambient, tel. 081 257 27 01


Gremi: regenza
Funtauna: rg chanzlia chantunala dal Grischun