Cuntegn da la pagina

Il cussegl grond decida davart la nova vischnanca da Lumnezia

  • Erste Mitteilung
  • Neuen Beitrag einfügen
En la proxima sessiun da december decida il cussegl grond davart la nova vischnanca da Lumnezia. La regenza suttametta al parlament la missiva concernent la fusiun da las vischnancas da Cumbel, Degen, Lumbrein, Morissen, Suraua, Vella, Vignogn e Vrin.

Fusiuns da vischnancas èn gia daditg in tema en Lumnezia: Gia l'onn 1963 han las duas vischnancas dad Uors e da Peiden fusiunà a la vischnanca dad Uors-Peiden. Stgars 40 onns pli tard, l'onn 2002, ha questa vischnanca puspè fusiunà – ensemen cun Camuns, Surcasti e Tersnaus – a la vischnanca da Suraua.

Ussa han las otg vischnancas da Cumbel, Degen, Lumbrein, Morissen, Suraua, Vella, Vignogn e Vrin decidì da furmar en l'avegnir ina vischnanca politica cun il num Lumnezia. Ils 25 da matg 2012 han stgars 87 pertschient da las votantas e dals votants da las otg vischnancas votà per la fusiun. Silsuenter ha la regenza approvà il contract da fusiun, ed en la sessiun da december decida il cussegl grond pia definitivamain davart la fusiun. La nova vischnanca da Lumnezia duai nascher il 1. da schaner 2013.

Ultra da l'ierta culturala cuminaivla, che sa mussa cunzunt tras la lingua rumantscha, han las vischnancas da fusiun er tratgs cuminaivels socials ed economics. Uschia han l'agricultura e la selvicultura ina gronda impurtanza en las bleras vischnancas. A Cumbel ed a Vella lavura la maioritad da las persunas emploiadas en il sectur da servetschs. Las otg vischnancas lumnezianas collavuran dapi onns intensivamain e cun success. Tut las vischnancas èn attribuidas a la gruppa da forza finanziala 4 (finanzialmain debel) ed han in pe da taglia da 120 pertschient, cun excepziun da Vrin che ha in pe da taglia da 110 pertschient.

Tenor l'avis da la regenza correspunda la fusiun da vischnancas en moda ideala a la refurma da las structuras territorialas en il chantun Grischun (refurma da vischnancas e dal territori). Il chantun promova la fusiun da vischnancas cun ina contribuziun totala da 9,1 milliuns francs. Plinavant vegnan concedidas prestaziuns spezialas en il senn d'ina garanzia dal possess actual, sco per exempel l'aboliziun da la limita minimala d'abitantas e d'abitants per pudair retrair contribuziuns da la gulivaziun da la forza fiscala.

L'onn 2010 abitavan circa 2200 persunas en las otg vischnancas da fusiun. La nova vischnanca da Lumnezia ha ina surfatscha considerabla da 16 543 hectaras. Pervia d'auters projects da fusiun vegniss il dumber da vischnancas grischunas a sa reducir per l'onn 2013 da 176 a 158. 


Infurmaziuns:
- presidenta da la regenza Barbara Janom Steiner, scheffa dal departament da finanzas e vischnancas, tel. 081 257 32 01
- Simon Theus, vicemanader da l'uffizi da vischnancas, tel. 081 257 23 87 
 

Gremi: regenza
Funtauna: rg chanzlia chantunala dal Grischun
Neuer Artikel