Cuntegn da la pagina

Inscunter dal cusseglier guvernativ Rathgeb cun la direcziun dal HCD

  • Erste Mitteilung
  • Neuen Beitrag einfügen
Dacurt èn il cusseglier guvernativ Christian Rathgeb, schef dal departament da giustia, segirezza e sanadad, Walter Schlegel, cumandant da la polizia chantunala dal Grischun, e Mathias Fässler, secretari dal departament, sa scuntrads cun la direcziun dal club da hockey da Tavau (HCD). Il tema principal da la discussiun che ha lieu annualmain è stada la segirezza tar ils gieus da hockey sin glatsch a Tavau. Las persunas responsablas da la politica, da la polizia e dal sport pon dar in bun attestat als fans.
 
L'inscunter cun il president dal HCD, Gaudenz F. Domenig, e cun il president d'onur dal HCD, Tarzisius Caviezel, ha mussà che la collavuraziun en il sectur da la segirezza funcziuna bain. Perquai che las persunas responsablas cumbattan en moda consequenta cunter ils paucs problems existents, poi vegnir desistì en il Grischun er vinavant da mesiras che chaschunan gronds custs. Da tuttas duas varts èn tant l'inscunter annual sin il stgalim directiv sco er ils contacts regulars e las cunvegnas en il sectur operativ vegnids giuditgads sco prezius e cunvegnents. La collavuraziun tranter il servetsch da segirezza dal HCD e la polizia chantunala dal Grischun funcziuna perfetgamain ed è sa cumprovada. Sco problematics vegnan giuditgads er vinavant circa 25 fans ch'èn pronts da duvrar violenza e ch'èn enconuschents a la polizia, sco er in pèr paucs gieus da hockey che pretendan mintgamai in'acziun da polizia pli gronda. Tar tut ils auters gieus dal HCD è la polizia chantunala dal Grischun en acziun cun paucs polizists en ed enturn il stadion a Tavau. Grazia a la buna collavuraziun ed al sustegn vicendaivel pon ils problems vegnir percepids e prendids per mauns a temp.

In laud per ils fans e per il club da fans
Ina giada dapli survegnan ils fans ed il club da fans dal HCD in bun attestat. Els s'engaschan en moda exemplarica e loiala, per ch'il sport stettia en il center e per che la violenza n'haja nagina plazza en ils conturns da gieus da hockey sin glatsch en il Grischun. Qua tras mettan els in segn cler cunter ils paucs fans ch'èn pronts da duvrar violenza. Il proceder consequent da la polizia chantunala dal Grischun cunter ils rowdies è sa cumprovà. Ils meds che stattan a disposiziun, sco scumonds d'entrar en il stadion u en tscherts areals, vegnan applitgads en cas da basegn, controllads ed exequids regularmain.

Adattaziuns tar il concordat davart las mesiras cunter la violenza a chaschun d'occurrenzas da sport
Actualmain vegn adattà il concordat dals 15 da november 2007 davart las mesiras cunter la violenza a chaschun d'occurrenzas da sport. En quest connex elavura la polizia chantunala dal Grischun la missiva correspundenta per mauns dal departament e da la regenza grischuna, per che la fatschenta possia vegnir tractada l'onn proxim en il cussegl grond. Da nov duai vegnir introducida in'obligaziun da dumandar ina permissiun per gieus da ballape e da hockey sin glatsch. Quai per pudair far differentas cundiziuns envers organisaturas ed organisaturs privats d'occurrenzas da sport. Tant las persunas responsablas dal chantun sco er la direcziun dal HCD èn da l'opiniun che questa obligaziun da dumandar ina permissiun saja da princip raschunaivla. Ella na duaja dentant betg purtar cundiziuns supplementaras per gieus nunproblematics dal HCD. Areguard la periclitaziun tras fans ch'èn pronts da duvrar violenza na pon gieus da hockey sin glatsch betg vegnir cumparegliads cun gieus da ballape. Plinavant n'è la situaziun en il Grischun actualmain betg uschè problematica sco tar uniuns en auters chantuns. 


Fotografia agiuntada:



Il cusseglier guvernativ Christian Rathgeb (segund da sanestra), il cumandant da polizia Walter Schlegel (a sanestra) ed il secretari dal departament Mathias Fässler (amez) s'inscuntran cun la direcziun dal HCD, represchentada da Gaudenz F. Domenig, president dal HCD (a dretga), e da Tarzisius Caviezel, president d'onur dal HCD. 


Infurmaziuns:
- cusseglier guvernativ Christian Rathgeb, schef dal departament da giustia, segirezza e sanadad, tel. 081 257 25 01
- Gaudenz F. Domenig, president dal club da hockey da Tavau, tel. 079 402 99 29 


Gremi: departament da giustia, segirezza e sanadad
Funtauna: rg departament da giustia, segirezza e sanadad
Neuer Artikel