Navigation

Inhaltsbereich

  • Erste Mitteilung
  • Neuen Beitrag einfügen
Oz e damaun sa scuntran anc ina giada expertas ed experts da tut ils pajais, da tut las regiuns e da tut ils chantuns da la Cuminanza da lavur da las regiuns alpinas (ARGE ALP) ad in lavuratori davart animals da rapina gronds. Il project prosperaivel da la ARGE ALP che stat sut direcziun grischuna va a fin a Zernez suenter 4 onns.

L'onn 2008 ha la ARGE ALP lantschà in project davart animals da rapina gronds en las Alps. La finamira dal project è stada quella da barattar experientschas fatgas cun animals da rapina gronds tranter expertas ed experts ch'èn activs en quest sectur e da rinforzar respectivamain da nuar da nov la rait da contacts. Il motiv è il return dal luf e da l'urs en singuls stadis da las Alps. Perquai che quests animals vivan en territoris da grond spazi èn dumandads tut ils pajais da las Alps da sa fatschentar cun questa problematica.

En la gronda part da las regiuns dals pajais da las Alps èn animals da rapina gronds vegnids extirpads gia avant passa 100 onns. La societad moderna na sa betg co ir enturn cun quests animals. Er l'utilisaziun da las Alps per l'agricultura e per il turissem è sa midada. Las Alps vegnan duvradas ozendi pli fitg da l'uman che pli baud. Ils problems che vegnan chaschunads da l'immigraziun d'animals da rapina gronds èn pli u main ils medems en tut il territori alpin. Perquai s'impona directamain in barat davart quest tema tranter expertas ed experts dals stadis da las Alps.

Urs, luf e luf-tscherver
Sut la direcziun da l'uffizi da chatscha e pestga dal Grischun ha gì lieu l'onn 2009 l'emprim lavuratori da la ARGE ALP davart animals da rapina gronds. Ils temas l'onn 2009 a Zernez èn stads las experientschas cun urs en il Grischun, il tschiffar els cun agid da helicopters, la problematica da rument organic e l'experientscha cun l'installaziun da mesiras per proteger las muntaneras. L'onn 2010 è vegnì organisà in segund lavuratori davart l'urs en il Trentino cun ils temas centrals dal manaschament d'urs e dal project da domiciliar l'urs en quella regiun. L'onn 2011 ha gì lieu il terz lavuratori davart il luf. A Puntina èn vegnids discutads ils conflicts cun l'agricultura da muntogna, mesiras da prevenziun e l'influenza dal luf sin ils effectivs da selvaschina.

Il tema dal quart ed ultim lavuratori dal project "Animals da rapina gronds en las Alps" è il luf-tscherver. Gievgia, ils 11, e venderdi, ils 12 d'october 2012, vegn discutada a Zernez la dumonda, pertge ch'il luf-tscherver ha – malgrà ina buna preschientscha en las Alps dal vest ed en las Alps centralas – dapli difficultads da sa derasar vers ost. Discutà vegn er il concept dal luf-tscherver en Svizra sco er il manaschament dal luf-tscherver en Baviera. Declerà vegn er, co ch'in luf-tscherver po vegnir tschiffà e co ch'el po vegnir surveglià cun traplas fotograficas. Sco tar ils auters lavuratoris èn las participantas ed ils participants expertas ed experts dals pajais, da las regiuns e dals chantuns da la ARGE ALP.

La bilantscha dal project da la ARGE ALP da 4 onns è fitg positiva. D'ina vart ha pudì vegnir intermediada sin plaun d'expertas e d'experts blera savida actuala davart animals da rapina gronds sur ils cunfins naziunals ora. L'interess per quests lavuratoris è stà grond. Da l'autra vart ha il barat d'experientschas contribuì ad in manaschament pli unitar da quests animals da rapina gronds en il territori alpin. Ils buns contacts tranter las expertas ed ils experts vegnan a mantegnair quai er sur la fasa da project ora.

Survista da la Cuminanza da lavur da las regiuns alpinas
La ARGE ALP ha l'intent d'approfundar la conscienza dad esser responsabel per il spazi da viver alpin, ed ella vul sviluppar vinavant questa conscienza en moda persistenta per il bain da las abitantas e dals abitants. A la cuminanza da lavur, ch'è vegnida fundada l'onn 1972 en il Tirol, appartegnan diesch pajais federativs, regiuns e chantuns da quatter stadis. Commembers èn ils chantuns svizzers Grischun, Son Gagl e Tessin, ils pajais federativs austriacs Salzburg, Tirol e Vorarlberg, il pajais federativ tudestg Baviera sco er las regiuns talianas Tirol dal Sid, Trient e Lumbardia. Presidiada vegn la ARGE ALP mintgamai per in onn d'in da ses commembers. Actualmain è quai il Tirol. Ulteriuras infurmaziuns sut: www.argealp.org


Infurmaziuns:
Georg Brosi, manader da l'uffizi da chatscha e pestga dal Grischun, tel. 081 257 38 91


Gremi: uffizi da chatscha e pestga dal Grischun
Funtauna: rg uffizi da chatscha e pestga dal Grischun
Neuer Artikel