Cuntegn da la pagina

Communicaziun da la regenza dals 18 d'october 2012

  • Erste Mitteilung
  • Neuen Beitrag einfügen
La regenza ha prolungà il program da vaccinaziun cunter cancer dal culiez da la madra. Ultra da quai è ella sa fatschentada cun differentas fatschentas da las vischnancas e da las regiuns. 

Il program da vaccinaziun cunter cancer dal culiez da la madra vegn cuntinuà
La regenza ha prolungà il program da vaccinaziun cunter cancer dal culiez da la madra (vaccinaziun da HPV) per il chantun Grischun fin l'onn 2015. Quel program è vegnì introducì l'onn 2008. Cun la realisaziun dal program da vaccinaziun è incumbensà l'uffizi da sanadad. I pon vegnir vaccinadas mattas e dunnas giuvnas dad 11 fin 26 onns che han lur domicil legal en il chantun Grischun il mument da la vaccinaziun. Dunnas giuvnas che n'han anc betg cumplenì lur 16avel onn da vegliadetgna ston preschentar al medi da vaccinaziun il consentiment en scrit da lur geniturs ubain da las persunas cun la pussanza dals geniturs. En il futur vegn tramessa a tut las dunnas giuvnas ina brev d'infurmaziun per il cumenzament da l'ultim onn da scola obligatoric. Il medem mument vegnan ellas er rendidas attentas a la vaccinaziun cunter hepatitis B. 

Waldhaus e Beverin da nov sin la glista da las chasas da tgira
Las clinicas psichiatricas Waldhaus a Cuira e Beverin a Cazas vegnan inscrittas cun tut en tut 10 letgs sin la glista da las instituziuns da lunga durada (glista da las chasas da tgira dal chantun Grischun). Questa decisiun è vegnida prendida sin dumonda dals servetschs psichiatrics dal Grischun (SPGR). Suenter che las partiziuns da psicogeriatria èn vegnidas serradas avant in pèr onns en las clinicas Waldhaus e Beverin, sa vesan ils SPGR adina pli savens confruntads cun il fatg che pazientas e pazients pli vegls che han passentà – pervia da lur indicaziun medicala – ina gronda part da lur vita en ina clinica, na pon betg vegnir transferids en ina chasa da persunas attempadas e da tgira convenziunala. Actualmain vegnan tgiradas correspundentamain sis persunas en tuttas duas clinicas. Per l'avegnir vegni fatg quint cun in basegn da 10 plazzas. Las instituziuns che figureschan sin la glista da las chasas da tgira èn admessas ad activitads a donn e cust da l'assicuranza obligatorica per la tgira da persunas malsaunas ed han il dretg da survegnir contribuziuns da prestaziun dal chantun e da las vischnancas. 

 
Da vischnancas e da regiuns
  • Flem: Il plan d'areal "1:500 Amiez" dals 5 da zercladur 2012 da la vischnanca da Flem vegn approvà. La plazza en il territori "Amiez" che sa chatta en il center da Flem Vitg vegn duvrà actualmain sco plazza da parcar e n'ha perquai strusch ina qualitad da vita. Il plan d'areal qua avant maun stgaffescha la basa dal dretg da planisaziun per augmentar la valur dal territori.
  • Sumvitg: La midada dal plan da zonas "1:1000 Cumpadials" dals 10 da matg 2012 da la vischnanca da Sumvitg vegn approvada. En connex cun la sanaziun da la chasa da persunas attempadas èsi previs da metter a disposiziun plazzas da parcar supplementaras. Per quest intent vegn determinada la zona per edifizis e stabiliments accessorics. En connex cun la meglieraziun generala currenta vegn la via tranter la chasa da persunas attempadas e las plazzas da parcar planisadas spustada ed engrondida. La via vegn attribuida a la zona da l'ulteriur territori communal.
  • Sevgein: La revisiun parziala da la planisaziun locala da la vischnanca da Sevgein dals 30 da matg 2012 vegn approvada. Latiers tutga ina revisiun da la lescha da construcziun, nua ch'è vegnida francada la basa per segirar la disponibladad da sulom sco er ina zona d'abitar stgaffida da nov. En la vischnanca da Sevgein na datti quasi pli nagin terren da construcziun disponibel. Per far frunt a questa mancanza vuless la vischnanca enzonar cun l'adattaziun da la planisaziun locala qua avant maun ina surfatscha da stgars ina mesa hectara. La finala vegn la nova senda tranter il vitg e la chasa da scola integrà en il plan general d'avertura "traffic".
  • Tschappina, Urmagn, Flearda, Cazas, Masagn, Tusaun e Seglias: Il project per la correcziun dal curs d'aua da las vischnancas da Tschappina, Urmagn, Flearda, Cazas, Masagn, Tusaun e Seglias per construir rempars en la Nolla vegn approvà. Als custs vegn pajada ina contribuziun chantunala da totalmain 102 500 francs.
  • Cazas: Il project "Rempars cunter squatschs da naiv en la chavorgia da Purtagn" da la vischnanca da Cazas vegn approvà. Als custs vegn garantida ina contribuziun da maximalmain 88 500 francs.
  • Tumegl: A la vischnanca da Tumegl vegn garantida ina contribuziun da maximalmain 145 500 francs per il conduct d'aua persa da la serenera da Veulden a l'implant da pumpadi a Giuvaulta.
  • Tumein: Il reglament per las zonas da protecziun ed il plan da las zonas da protecziun en la scala 1:1500 ed 1:25 000 per las funtaunas da Ried "davant" ed "amez" da la vischnanca da Tumein vegnan approvads.
  • Casti-Vargistagn: La nova constituziun da la vischnanca da Casti-Vargistagn dals 31 d'avust 2012 vegn approvada.
  • Andeer: La revisiun parziala dals statuts da la "Corporaziun da vischnancas per la chasa da persunas attempadas dal Rain posteriur (chasa da persunas attempadas e da tgira)" cun sedia ad Andeer vegn approvada. La corporaziun porta da nov il num "Corporaziun regiunala da vischnancas dal Rain posteriur per il center da tgira Glienda".
  • regioViamala e regiun Surselva: L'adattaziun dals plans directivs regiunals "Natira e cuntrada" da la regioViamala e da la regiun Surselva per determinar il parc natiral Beverin vegn approvada. Il medem mument vegni concludì d'adattar il plan directiv chantunal en il sectur da la cuntrada dal parc natiral regiunal Beverin.
  • Mulegns: Il project "Protecziun cunter crudada da crappa Mulegns, H3a via dal Güglia" da la vischnanca da Mulegns vegn approvà. Als custs vegn garantida ina contribuziun da maximalmain 296 250 francs.
  • Ftan e Scuol: Il plan dal cunfin tranter las vischnancas da Ftan e da Scuol vegn approvà. 
         

Contribuziuns chantunalas a differentas instituziuns

  • Uniun grischuna d'artisanadi e mastergn: A l'uniun grischuna d'artisanadi e mastergn vegn concedida ina contribuziun da maximalmain 219 000 francs per l'exposiziun professiunala "Fiutscher 2012" che ha lieu a Cuira dals 6 fin ils 11 da november 2012. 
         

Projects da vias
La regenza ha approvà 7,4 milliuns francs per lavurs da construcziun sin il suandant traject:
- via da Tràn: lavurs d'impressari, construcziun nova dal tunnel Plattas 


Gremi: regenza
Funtauna: rg chanzlia chantunala dal Grischun

Neuer Artikel