Navigation

Inhaltsbereich

  • Erste Mitteilung
  • Neuen Beitrag einfügen
L'analisa dal DNA vi dal skelet presumtiv da l'erox grischun da la libertad Jörg Jenatsch n'ha betg purtà la tschertezza absoluta davart l'identitad dal mort. La gruppa da perscrutadras e perscrutaders internaziunala dal servetsch archeologic dal Grischun, da l'universitad Demokrit da la Trachia sco er da l'universitad da Turitg parta dentant sin basa da differents indizis dal fatg che effectivamain Jörg Jenatsch è sepulì en la catedrala da Cuira.

Il colonel Jörg Jenatsch (1596–1639), in dals manaders da las truppas grischunas en la Guerra da trent'onns, è vegnì mazzà durant il tschaiver l'onn 1639 e sepulì en la catedrala da Cuira. L'onn 1959 è il skelet probabel da Jörg Jenatsch vegnì exhumà per l'emprima giada ed examinà scientificamain. Ils resultats da lezzas uras n'èn dentant mai vegnids publitgads.

Dapi 1 onn evaluescha il servetsch archeologic dal Grischun cun il sustegn da scienziadas e scienziads da las universitads da Turitg, da Berlin, da Kiel e da la Trachia il cuntegn da questa fossa. La fossa probabla da Jörg Jenatsch è vegnida averta da nov il mars 2012. "Nus avain tranter auter vulì verifitgar l'identitad dal skelet cun agid da novas metodas da l'analisa genetica", ha declerà l'archeolog chantunal dal Grischun Thomas Reitmaier. Trais descendents che vivan e che derivan da la lingia masculina directa da la parentella da Jörg Jenatsch, han surdà emprovas da la mucosa da la bucca per cumparegliar lur DNA cun quella dal skelet. Cunquai ch'il DNA che cuntegna il cromosom Y vegn transmess tal e qual dal bab al figl, stuessan ils descendents da Jenatsch avair il medem muster da cromosoms sco il skelet. 

Conservà DNA antic
Tar l'analisa d'emprovas archeologicas stoi vegnir garantì ch'il DNA extratg e savens fermamain fragmentà derivia effectivamain dal material examinà e ch'el na saja betg vegnì contaminà cun DNA modern. Il DNA da parts da l'oss da la coissa sco er d'in molar è vegnì examinà en il center per medischina evoluziunara da l'institut d'anatomia da l'universitad da Turitg. "Il DNA ch'ins ha extratg era fermamain degradà. Nus avain tuttina pudì far analisas geneticas", ha ditg la biologa moleculara Cordula Haas da l'institut per medischina legala da l'universitad da Turitg, nua che las emprovas èn er vegnidas examinadas.

Per examinar la parentella da Jörg Jenatsch cun ils descendents masculins da ses basat èn vegnidas controlladas caracteristicas dal cromosom Y, ils uschenumnads Y-STRs (short tandem repeats) ed ils Y-SNPs (single nucleotide polymorphisms). Ils 22 Y-SNPs controllads eran identics tant tar ils trais descendents sco er tar il skelet. Quest muster da Y-SNP datti dentant savens en l'Europa centrala. Perquai n'è il resultat betg fitg expressiv. Ils Y-STRs han mussà resultats identics tar ils descendents. 3 da 23 Y-STRs controllads eran differents tar il skelet. L'evaluaziun biostatica davart la probabilitad da parentella n'ha betg dà in resultat persvadent. "Cun examinaziuns geneticas n'avain nus pia betg pudì cumprovar cumplainamain l'identitad dal skelet", ha ditg Cordula Haas. 

Buns indizis
Restar restan quels indizis che han pudì vegnir consultads per identifitgar la bara gia avant l'analisa genetica. Tenor l'infurmaziun da Christina Papageorgopoulou, l'antropologa directiva dal project, sa tracti tar il skelet masculin d'in individi creschì d'ina vegliadetgna matura – pia pli vegl che 40 onns e pli giuven che 60 onns. Quai constess per Jenatsch ch'è vegnì assassinà cun 43 onns. Ultra da quai èsi fitg probabel che las fracturas ch'èn vegnidas constatadas vi da la chavazza dal skelet han chaschunà la mort da la persuna. Er quest indizi correspunda a la mort da Jenatsch ch'è vegnida chaschunada evidentamain tras culps cun la sigir sin il chau. Ultra da quai identifitgescha la vestgadira il mort sco ina persuna ritga betg clericala che ha vivì il 17avel tschientaner. E la finala correspunda il lieu da sepultura ad ina funtauna contemporana, tenor la quala Jenatsch è vegnì sepulì en la catedrala da Cuira sut l'orgla. "Tut en tut buns indizis", è il facit dal manader dal project Manuel Janosa. "Cun gronda probabilitad dastgain nus supponer che quai è la fossa da Jörg Jenatsch." 
 

Fotografias agiuntadas:
Illustraziun 1:
Illustraziun_1.jpg
Exhumaziun dal skelet la primavaira 2012. Christina Papageorgopoulou, l'antropologa directiva da l'exhumaziun, declera al manader dal project Manuel Janosa sias emprimas impressiuns da la chavazza chattada.

Illustraziun 2:
Illustraziun_2.jpg
Natalia Shved dal center per medischina evoluziunara da l'universitad da Turitg (a sanestra) e Christina Papageorgopoulou retiran emprovas da la fossa averta.

Illustraziun 3:
Illustraziun_3.JPG
En il labor dal center per medischina evoluziunara da l'universitad da Turitg vegn fatga ina soluziun d'extracziun per in'emprova dal DNA.

Illustraziun 4:
Illustraziun_4.jpg
L'analisa dal DNA en l'institut per medischina legala da l'universitad da Turitg.

Remartga:
Davart quest tema stat a disposiziun in video sut www.gr.ch
 

Infurmaziuns: 
Servetsch archeologic dal Grischun: 
Thomas Reitmaier, archeolog chantunal dal Grischun, tel. 081 257 48 60, thomas.reitmaier@adg.gr.ch  
Manuel Janosa, manader dal project davart la retschertga e la publicaziun da la fossa da Jenatsch, tel. 079 467 67 12, manuel.janosa@adg.gr.ch 

Universitad da Turitg: 
Frank Rühli, manader dal center per medischina evoluziunara (labor aDNA) a l'institut d'anatomia da l'universitad da Turitg, tel. 079 718 67 99, frank.ruhli@anatom.uhz.ch  
Cordula Haas, biologa moleculara a l'institut per medischina legala da l'universitad da Turitg, tel. 044 635 56 56

Universitad Demokrit da la Trachia, Grezia: 
Christina Papageorgopoulou, antropologa directiva dal project davart la retschertga e la publicaziun da la fossa da Jenatsch, tel. 0030 6972 796 736, cpapage@he.duth.gr  

Odinariat episcopal da Cuira: 
Giuseppe Gracia, incumbensà per medias e communicaziun, tel. 079 632 61 81


Gremi: Servetsch archeologic dal Grischun
Funtauna: rg Servetsch archeologic dal Grischun
Neuer Artikel