La cumissiun predeliberanta dal cussegl grond sustegna unanimamain la fusiun da las vischnancas da Cumbel, Degen, Lumbrein, Morissen, Suraua, Vella, Vignogn e Vrin a la vischnanca da Lumnezia.

Cun la missiva dals 28 d'avust 2012 propona la regenza al cussegl grond d'approvar la fusiun da las vischnancas da Cumbel, Degen, Lumbrein, Morissen, Suraua, Vella, Vignogn e Vrin a la vischnanca da Lumnezia. La fusiun duai vegnir realisada per il 1. da schaner 2013. Sut il presidi dal deputà Maurus Tomaschett ed en preschientscha da la presidenta da la regenza Barbara Janom Steiner sco er dals presidents da las vischnancas pertutgadas ha la cumissiun predeliberanta dal cussegl grond predeliberà questa fatschenta per mauns dal cussegl grond.

Ils 25 da matg 2012 han las votantas ed ils votants da las otg vischnancas pertutgadas approvà cleramain la fusiun da lur vischnancas, e quai en media cun 87 pertschient. Sco usità han represchentantas e represchentants da las vischnancas e da las autoritads infurmà la cumissiun predeliberanta dal cussegl grond al lieu davart il project da fusiun. Suenter ina debatta detagliada ha la cumissiun decidì unanimamain d'entrar en il project e da proponer al cussegl grond d'approvar la fusiun e da metter en vigur il conclus per il 1. da schaner 2013. La cumissiun è unanimamain da l'avis che la fusiun da vischnancas saja exemplarica ed haja in perimeter da fusiun ideal. Cunquai che tut las vischnancas pertutgadas appartegnan al medem circul, na chaschuna questa fusiun er naginas midadas da l'appartegnientscha als circuls. Percunter sa reducescha il dumber da vischnancas dal circul da la Lumnezia dad actualmain 11 a da nov 4 vischnancas, sch'il cussegl grond approvescha il project en la sessiun da december 2012. 
 

Infurmaziuns:
president da la cumissiun Maurus Tomaschett, tel. 079 605 04 40 
 

Gremi: cumissiun predeliberanta per la fusiun a la vischnanca da Lumnezia
Funtauna: rg cumissiun predeliberanta per la fusiun a la vischnanca da Lumnezia