Cuntegn da la pagina

Ils gieus olimpics d'enviern 2022 en il Grischun èn pronts per vegnir tractads en il cussegl grond

  • Erste Mitteilung
  • Neuen Beitrag einfügen
La cumissiun dal cussegl grond per economia e taxas ha predeliberà la missiva da la regenza per ils XXIV. gieus olimpics d'enviern Grischun 2022 per mauns da la sessiun da december 2012 dal cussegl grond. Suenter discussiuns intensivas durant in di e mez recumonda la gronda maioritad da la cumissiun al cussegl grond d'entrar en la fatschenta, d'acceptar il project cun ina cumplettaziun e da recumandar a las votantas ed als votants d'approvar l'inoltraziun d'ina candidatura per realisar ils gieus olimpics.

Cun la missiva dals 5 da settember 2012 suttametta la regenza al cussegl grond il concept per la candidatura e per la realisaziun dals XXIV. gieus olimpics d'enviern Grischun 2022. Sut la direcziun dal president da la cumissiun Roger Vetsch ha la cumissiun dal cussegl grond per economia e taxas (CET) predeliberà il project cumplex durant in di e mez per mauns dal cussegl grond. A la sesida è er sa participà il cusseglier guvernativ Hansjörg Trachsel.

La cumissiun ha sa laschà declerar detagliadamain il concept per la candidatura e per la realisaziun da gieus olimpics d'enviern en il Grischun. En discussiuns intensivas èn ils accents vegnids mess cunzunt sin ils custs per il chantun Grischun e sin la persistenza. Per la cumissiun èsi indispensabel che mo gieus persistents dastgan avair lieu en il Grischun, ed ella sustegna senza resalvas l'idea da gieus che han lieu en in rom natiral. La candidatura dal Grischun 2022 è pia ina vaira alternativa als gieus convenziunals che prevesan ina cumbinaziun dal territori urban per las concurrenzas da glatsch e dals territoris da muntogna periferics per las disciplinas da naiv. Areguard ils custs renviescha la cumissiun a la clera cunfinaziun tranter la candidatura, a la quala il chantun sa participescha cun 8 milliuns francs, l'organisaziun e la realisaziun dals gieus, ch'èn chaussa da la confederaziun, ed ils custs per l'infrastructura e per la segirezza, per ils quals il chantun duai furmar reservas da 300 milliuns francs. Uschia duai vegnir cuntanschida ina segirezza maximala areguard ils custs, ed ils gieus duain da princip pudair vegnir finanziads sur il preventiv ordinari. En quest connex fa la cumissiun dentant anc ina pretensiun supplementara, numnadamain ch'i duai vegnir fixà explicitamain ch'il chantun Grischun na surpiglia nagin deficit per la realisaziun operativa dals gieus.

Ina minoritad da la cumissiun pretenda percunter che la missiva vegnia returnada a la regenza per la laschar repassar. Ella pretenda che la regenza preschentia al cussegl grond in concept da svilup sco alternativa als gieus olimpics d'enviern. Ils 300 milliuns francs ch'èn previs per ils gieus olimpics duessan alura star a disposiziun per ils programs da quest concept da svilup.

La cumissiun per economia e taxas recumonda unanimamain al cussegl grond d'entrar en il project, ed ella sustegna las propostas da la regenza cun 10 cunter 1 vusch. Il cussegl grond vegn a tractar la missiva per ils XXIV. gieus olimpics d'enviern Grischun 2022 en la proxima sessiun da december 2012. Sch'er il cussegl grond approvescha il project, han las votantas ed ils votants dal Grischun ils 3 da mars 2013 l'ultim pled en chaussa. 
 

Infurmaziuns:
president da la cumissiun Roger Vetsch, tel. 079 353 50 48


Gremi: cumissiun per economia e taxas
Funtauna: rg cumissiun per economia e taxas
Neuer Artikel