Cuntegn da la pagina

Communicaziun da la regenza dals 20 da december 2012

  • Erste Mitteilung
  • Neuen Beitrag einfügen
La regenza grischuna ha disponì la sanaziun da l'aua restanta da las Ovras electricas dal Rain posteriur. A sia ultima sesida da quest onn ha ella plinavant concedì contribuziuns, mess en vigur pliras leschas ed ordinaziuns per il 1. da schaner 2013 ed approvà projects da vias. 

Concludì la sanaziun da l'aua restanta da las Ovras electricas dal Rain posteriur
La regenza ha approvà e concludì in catalog da mesiras per sanar l'aua restanta da las Ovras electricas dal Rain posteriur SA (OERP) ch'era vegnì elavurà d'ina gruppa da lavur. Las OERP vegnan obligadas da consegnar als stgalims chantunals da las ovras electricas las quantitads d'aua da dotaziun prescrittas. L'aua restanta vegn sanada en enclegientscha e resguardond tut ils acturs impurtants: En la gruppa da lavur, ch'era vegnida lantschada da las OERP, eran er represchentadas las organisaziuns da l'ambient WWF e Pro natura sco er la federaziun chantunala dals pestgaders grischuns. Las perditas da producziun che resultan per las OERP tras las mesiras da sanaziun vegnan qualifitgadas tut en tut sco economicamain anc supportablas. Davart las mesiras da sanaziun a las tschiffadas d'aua dal stgalim internaziunal decida la confederaziun. La disposiziun per ils stgalims chantunals da las ovras electricas è coordinada cun la disposiziun da sanaziun da la confederaziun.
Las OERP tutgan tar las grondas interpresas dal provediment d'energia en il chantun Grischun. Cun circa 1400 milliuns uras kilowatt (kWh) per onn producescha ella bunamain in tschintgavel da l'electricitad or da forza idraulica en il Grischun. 

Ulteriur sustegn per la plattafurma turistica electronica dal Grischun
La plattafurma turistica electronica dal Grischun (e-plattafurma GR) vegn sustegnida er vinavant. Per projects parzials da l'onn proxim ha la regenza approvà ina summa maximala da 470 000 francs. Quai cun la resalva ch'il cussegl grond concedia ils credits respectivs.
La plattafurma turistica electronica dal Grischun è ina part dal project da refurma "Structuras cumpetitivas e repartiziun da las incumbensas en il turissem grischun" ch'è vegnì lantschà l'onn 2006. Cun la plattafurma turistica electronica èsi reussì da stgaffir ina basa per tut las organisaziuns turisticas grischunas, per Grischun vacanzas sco er per la Viafier retica. La plattafurma permetta da gudagnar cuminaivlamain novs giasts e d'augmentar la professiunalitad en il sectur da la tecnologia d'infurmaziun. Las mesiras vegnan realisadas tras la Graubünden eTourism ScRL (gruppa da project) ch'è vegnida fundada dals suandants partenaris: Grischun vacanzas, destinaziun Tavau Claustra, organisaziun turistica Engiadina San Murezzan, gruppa Arena alva e Viafier retica. Da vart dal chantun sa participescha l'uffizi per economia e turissem a la gruppa da project. 

Ultima fasa da la furmaziun supplementara da persunas d'instrucziun en rumantsch grischun
En il rom dal project "Rumantsch grischun en scola" survegnan las persunas d'instrucziun dal stgalim superiur da tut las vischnancas da piunier ils onns 2013/2014 ina furmaziun supplementara. La scola auta da pedagogia dal Grischun è vegnida incaricada da la regenza da terminar durant questa perioda la furmaziun supplementara da persunas d'instrucziun tenor il concept general "Rumantsch grischun en scola". Per questa incarica vegnan impundids tut en tut maximalmain 455 000 francs. Quai cun la resalva ch'il cussegl grond concedia ils credits necessaris. Per la fin da l'onn 2014 vegn elavurà in rapport final davart l'entira furmaziun supplementara da persunas d'instrucziun en il rom dal project "Rumantsch grischun en scola". 

Decleraziun da taglia electronica ed ulteriuras novaziuns
La regenza metta en vigur las suandantas leschas ch'il cussegl grond dal Grischun aveva revedì parzialmain, e concluda l'adattaziun da las ordinaziuns resp. da las disposiziuns executivas appartegnentas:
Lescha da taglia. La revisiun parziala da la lescha chantunala da taglia vegn messa en vigur per il 1. da schaner 2013. Quai cun excepziun da singuls artitgels che suondan pli tard ensemen cun las disposiziuns correspundentas da la lescha federala davart la taglia federala directa. En il rom da la revisiun da la lescha èn er las disposiziuns executivas tar la legislaziun da taglia vegnidas suttamessas ad ina revisiun parziala. Da nov vegn l'administraziun da taglia autorisada da dar – a partir da la perioda fiscala 2012 – la pussaivladad d'inoltrar la decleraziun da taglia sin via electronica. L'introducziun è previsa en il rom d'ina fasa da test durant la segunda mesadad da l'onn 2013 per la decleraziun da taglia 2012 ed en general a partir da la decleraziun da taglia 2013. Las pajataglias ed ils pajataglias pon pia tscherner en l'avegnir, sch'ellas ed els vulan inoltrar lur decleraziun da taglia sin via electronica.
Lescha per promover la tgira da persunas malsaunas. La revisiun parziala da la lescha per promover la tgira da persunas malsaunas e l'assistenza da persunas attempadas e da persunas che basegnan tgira (lescha per promover la tgira da persunas malsaunas) vegn messa en vigur per il 1. da schaner 2013. Qua tras vegnan fixadas sin il stgalim da la lescha las pretensiuns chantunalas che ston vegnir ademplidas – supplementarmain a las prescripziuns federalas – dals furniturs da prestaziuns che s'annunzian per s'inscriver sin la glista dals ospitals resp. per survegnir ina incarica da prestaziun. Medemamain vegn stgaffida ina basa legala per pudair ordinar sancziuns envers furniturs da prestaziuns che n'adempleschan betg l'incarica da prestaziun.
Per pudair realisar las prescripziuns federalas tar la nova planisaziun dals ospitals sto vegnir adattada – ultra da la lescha – er l'ordinaziun appartegnenta. La regenza ha concludì ina revisiun parziala correspundenta da l'ordinaziun tar la lescha per promover la tgira da persunas malsaunas. Er disposiziuns en connex cun la nova finanziaziun dals ospitals èn vegnidas midadas. Differents artitgels da l'ordinaziun èn ultra da quai vegnids adattads a novas noziuns e designaziuns.
Lescha davart ils supplements da famiglia. La revisiun parziala da la lescha davart ils supplements da famiglia vegn messa en vigur per il 1. da schaner 2013. Sin basa da la revisiun da la lescha ston er vegnir adattadas las disposiziuns executivas appartegnentas, perquai che tut las persunas cun activitad da gudogn (pia er quellas cun activitad da gudogn independenta) en professiuns betg agriculas han da nov il dretg da survegnir supplements da famiglia. La regenza ha approvà ina revisiun parziala correspundenta da las disposiziuns executivas tar la lescha davart ils supplements da famiglia. 

Midà la calculaziun da la reducziun da las premias
La regenza ha fatg ina correctura tar la calculaziun da la reducziun da las premias. Per fixar las premias ch'èn decisivas per la reducziun da las premias vegnan las premias medias mensilas, ch'èn vegnidas fixadas da la confederaziun, reducidas da nov per 10 pertschient (fin ussa 8 pertschient). Uschia pon ils custs da la reducziun da las premias vegnir sminuids per 2 milliuns francs. Ina revisiun parziala correspundenta da l'ordinaziun tar la lescha davart l'assicuranza da malsauns e la reducziun da las premias entra en vigur il 1. da schaner 2013. 
 

Da vischnancas e da regiuns
  • Claustra-Serneus: Il nov project per construir rempars per l'aual dal vitg da Serneus en la vischnanca da Claustra-Serneus vegn approvà cun cundiziuns. I vegn construì in batschigl cun in volumen da circa 2000 meters cubic che duai retegnair la gera e che serva a medem temp sco implant da stgargiada d'aua gronda. La contribuziun chantunala al project importa maximalmain 107 800 francs.
  • Val Müstair: A la vischnanca da Val Müstair vegn garantida ina contribuziun da maximalmain 223 234 francs per colliar l'aua persa cun la serenera dal Vnuost Sura e per midar il batschigl da nettegiament secundar da la serenera Sot Rivas en in batschigl per aua da plievgia. La serenera Sot Rivas è antiquada. Percunter ha la serenera dal Vnuost Sura da la provinza autonoma Bulsaun – Tirol dal sid capacitads avunda per sa colliar cun la Val Müstair.
  • Domat: Per il mantegniment da la plazza da transit per viagiantas e viagiants esters "Tuleu" vegn pajada a la vischnanca da Domat da nov ina pauschala annuala da 10 000 francs (fin ussa 3000 francs). Ils custs per administrar la plazza da transit èn creschids considerablamain ils onns passads, e quai a donn e cust da la vischnanca da staziunament.
  • Grüsch: La revisiun totala da la lescha davart las taxas da cura da la vischnanca da Grüsch dals 23 da november 2012 vegn approvada.
  • Panaduz: La revisiun parziala da la lescha da taglia da la vischnanca da Panaduz dals 5 da december 2012 vegn approvada.
  • Arosa / Cuira: La reuniun da las vischnancas d'Arosa, Calfreisen, Castiel, Cuira, Haldenstein, Langwies, Lüen, Maladers, Molinis, Peist, St. Peter-Pagig e Tschiertschen-Praden al circul da register funsil Plessur, che cumpiglia ils dus uffizis dal register funsil Arosa e Cuira, vegn approvada. Questa reuniun va en vigur per il 1. da schaner 2013 e tegna quint da la fusiun da vischnancas en il Scanvetg (nova vischnanca d'Arosa).
  • Brusio / Puschlav: La reuniun da la gestiun dal register funsil da las vischnancas da Brusio e da Puschlav al nov circul da register funsil Valposchiavo vegn approvada. Questa reuniun va en vigur per il 1. da schaner 2013.
  • Engiadin'ota: Il plan directiv regiunal cumplessiv, concludì dal cussegl cirquital da l'Engiadin'ota ils 26 da schaner 2012, vegn approvà. Consequentamain vegnan adattads intgins puncts dal plan directiv chantunal.
  • Grischun central: Ils statuts da la corporaziun da vischnancas "Manaschi forestal e tecnic Alvra" vegnan approvads.

Contribuziuns chantunalas a differentas instituziuns
  • Cooperativa da manaschi ViamalaInfra: A la cooperativa da manaschi ViamalaInfra vegn concedì in emprest da la confederaziun da 470 000 francs en il rom da la nova politica regiunala (NPR) per il project "Renovaziun da l'infrastructura da la chavorgia da la Viamala". Quai cun la resalva che la finanziaziun totala saja reglada. Sco prestaziun d'equivalenza a l'emprest da la NPR vegn garantida ina contribuziun chantunala da 79 120 francs. Resalvada resta la concessiun dals credits necessaris tras il cussegl grond.
    Tras il project duai l'infrastructura per las visitadras ed ils visitaders da la chavorgia da la Viamala vegnir adattada als basegns d'ozendi. Igl è previs da renovar las stgalas per descender en la chavorgia, da construir ina nova punt en la chavorgia, d'installar in nov sistem da bigliets, da renovar il kiosc e las tualettas sco er da construir in nov magazin da material ed in segund lieu da vendita.
  • AutoDaPosta Svizra SA: A l'AutoDaPosta Svizra SA, regiun Grischun, vegn garantida ina contribuziun chantunala da maximalmain 360 000 francs per installar – en ils autos da posta sin differentas lingias grischunas – sistems per infurmar las passagieras ed ils passagiers tenor la lescha federala davart l'egualitad da persunas cun impediments.

Projects da vias
  • Nov access da Schlarigna: La regenza ha approvà il project d'exposiziun midà per la correcziun da la via d'Engiadina, midada da l'access da Schlarigna. Il project cuntegna ina rundella d'in diameter da 32 meters en il sectur dal sutpassadi actual a la staziun Staz. Tant il vitg da Schlarigna sco er la staziun Staz vegnan colliads cun la rundella sur dus bratschs. Ils custs totals dal project d'exposiziun importan circa 17 milliuns francs. A medem temp vegn realisà in project da la vischnanca da Schlarigna che prevesa da construir in rempar da protecziun cunter la canera per lung da la via d'Engiadina ed ina paraid da protecziun cunter la canera sin la nova punt da l'En sco er da renovar la via communala Bambas-ch.
  • Correcziun da la via a Lumneins: Il project d'exposiziun per la correcziun da la via sursilvana a Lumneins vegn approvà. Il traject en il sectur da la fracziun Lumneins na correspunda betg pli als basegns ed a las pretensiuns da segirezza da la rait da vias principalas. Plinavant prevesa il project in trassé pli armonic.
Ultra da quai ha la regenza approvà 1,78 milliuns francs per lavurs da construcziun sin ils suandants trajects:
- via da la Chlus: lavurs d'impressari e da cuvrida, punt da la Landquart, Felsenbach
- via dal Güglia / dal Malögia: lavurs d'impressari, sviament da Silvaplauna
- via dal Bernina: lavurs da cuvrida, access da Viano


Per la fin da l'onn
Durant l'onn che va a fin ha la regenza grischuna salvà 44 sesidas. En tut ha ella prendì 1246 conclus (onn precedent: 1153).
Il presidi da la regenza vegn surpiglià il 1. da schaner 2013 da Hansjörg Trachsel, schef dal departament d'economia publica e fatgs socials. Vicepresident daventa Mario Cavigelli, schef dal departament da construcziun, traffic e selvicultura.
La regenza giavischa a tut las conburgaisas ed a tut ils conburgais bels e paschaivels dis da festa e per l'onn nov tut il bun, confidenza e sanadad.


Gremi: regenza
Funtauna: rg chanzlia chantunala dal Grischun
Neuer Artikel