Dals 28 da schaner fin il 1. da favrer 2013 realisescha il center da furmaziun e cussegliaziun agricula Plantahof a Landquart l'emna tradiziunala da geniturs. Las emprendistas ed ils emprendists dal terz onn d'emprendissadi surpiglian durant in'emna il manaschi da lur geniturs, entant ch'ils geniturs van a scola.

Onn per onn ha lieu l'emna da geniturs en il center da furmaziun e cussegliaziun agricula Plantahof a Landquart. Er quest onn interrumpan las emprendistas ed ils emprendists dal terz onn d'emprendissadi durant in'emna lur semester d'enviern al Plantahof. Da glindesdi, ils 28 da schaner, fin venderdi, il 1. da favrer 2013, lavuran ellas ed els sin il manaschi agricul dals geniturs, entant ch'ils geniturs surpiglian lur plazza en scola.
L'emna da geniturs vegn stimada zunt fitg da tuttas duas generaziuns. Per ils geniturs èsi ina interrupziun bainvegnida da la lavur quotidiana sin il manaschi. L'emna da geniturs als dat plinavant la chaschun da refrestgentar las enconuschientschas professiunalas, ed ella permetta da barattar las experientschas cun persunas da la pratica. La cumpagnia stat en il center. Sco lur figlias e lur figls na van ils geniturs numnadamain betg mo a scola, mabain pernotteschan er en l'internat dal Plantahof. L'emna da geniturs è organisada uschia che las mammas stattan da glindesdi fin mesemna ed ils babs da glindesdi fin venderdi al Plantahof. Ultra da l'instrucziun èn er il suentermezdi da las generaziuns ed in'excursiun (tar Georg Fischer a Seewis) cumponentas fixas da l'emna da geniturs.
Las emprendistas ed ils emprendists han l'incumbensa da manar durant l'emna da geniturs il bain puril senza la surveglianza dal bab. Savens èsi l'emprima giada ch'ellas ed els èn responsabels uschè ditg sulets per il manaschi. Las emprendistas ed ils emprendists apprezieschan dentant zunt fitg questa experientscha. 


Agiunta:
Program da l'emna da geniturs 2013 


Infurmaziuns:
Renato Mengelt, magister spezialisà per economia da manaschi al Plantahof, tel. 081 257 60 35, e-mail: renato.mengelt@plantahof.gr.ch  


Gremi: center da furmaziun e cussegliaziun agricula Plantahof
Funtauna: rg center da furmaziun e cussegliaziun agricula Plantahof