A partir d'immediat stat a disposiziun ina pagina d'internet dal chantun Grischun optimada per smartphones. Grazia ad in nov layout po la purschida cumpletta da www.gr.ch vegnir duvrada en moda pli simpla da quels ch'èn en viadi.

L'internet mobil e la quota da las visitas sin las paginas d'internet creschan ad in crescher. Versiuns mobilas da paginas d'internet vegnan adina pli impurtantas. Quellas porschan in'utilisaziun simpla, svelta e nuncumplitgada sco er ina meglra legibladad. La purschida d'internet cumpletta e multilingua dal chantun Grischun www.gr.ch è ussa vegnida optimada per smartphones. La vista mobila vegn applitgada automaticamain, sch'ins visita la pagina d'internet cun in smartphone, senza ch'i sto vegnir installada per quai in'applicaziun separada. Las utilisadras ed ils utilisaders pon midar da tut temp tranter la vista mobila e la vista classica. La vista mobila funcziuna sin tut ils tips da smartphones usitads.
Cun realisar il layout per smartphones è vegnida meglierada la pagina d'access dal portal per las burgaisas e per ils burgais www.gr.ch. Il portal sa divida da nov en las rubricas "Actual", "Communicaziuns", "Videos", "Directamain tar", "Servetschs online", "Top links", "Servetschs ed infurmaziun", "Turissem e temp liber" sco er "Ans suandai".

Gia dapi la fin da settember 2012 sustegna la pagina d'internet ils novs standards da l'internet HTML5 e CSS3. Quests standards han l'avantatg che las paginas d'internet vegnan preschentadas optimalmain – independentamain da l'apparat e dal program d'internet – tant sin computers stabels sco er sin apparats mobils sco smartphones e tablets cun visurs da differentas grondezzas e da differentas resoluziuns.


Gremi: chanzlia chantunala dal Grischun
Funtauna: rg chanzlia chantunala dal Grischun