La regenza suttametta al cussegl grond la missiva tar ina revisiun totala da la lescha davart la cassa da pensiun chantunala dal Grischun. Proponì vegn ina lescha che sa restrenscha a l'essenzial, che ademplescha il nov dretg federal e che dat a la cassa da pensiun in'autonomia supplementara. I vegn gia annunzià in ulteriur project per segirar las prestaziuns da rentas.

Las instituziuns da prevenziun da dretg public duain survegnir dapli libertad d'agir e lur segirezza finanziala duai vegnir garantida. Questa finamira persequitescha la midada da la lescha federala davart la prevenziun professiunala per vegls, survivents ed invaliditad (LPP) ch'è entrada en vigur per il 1. da schaner 2012. Cun l'independenza sco er cun la finanziaziun restanta da la cassa da pensiun chantunala dal Grischun ha il chantun Grischun gia realisà las prescripziuns decisivas dal dretg federal. Ulteriurs puncts ston dentant anc vegnir realisads.

La regenza suttametta al cussegl grond la missiva tar ina revisiun totala da la lescha davart la cassa da pensiun chantunala dal Grischun. I vegn stgaffida ina lescha generala che sa restrenscha a l'essenzial e che tegna quint da la nova repartiziun da las incumbensas tranter il legislatur – il cussegl grond – e l'organ suprem da la cassa da pensiun – la cumissiun administrativa. Cun in nov num "Cassa da pensiun dal Grischun" vegn exprimì ultra da quai meglier che l'instituziun da prevenziun stat a disposiziun a tut las corporaziuns da dretg public en il chantun. 

Il legislatur regla la finanziaziun
Tenor la missiva da la regenza fixescha il cussegl grond ils princips per finanziar la cassa da pensiun e las contribuziuns. La cumissiun administrativa survegn dapli cumpetenzas e dapli responsabladad. Ella surpiglia la direcziun generala da la cassa e fixescha en l'avegnir en spezial las prestaziuns e las premissas da prestaziun, approvescha il quint annual e nominescha la direcziun.

La chapitalisaziun cumplaina da la cassa da pensiun vegn fixada en la lescha. Tar la chapitalisaziun cumplaina sto ina cassa porscher da tut temp la segirezza da pudair ademplir tut las obligaziuns. La cassa sto da princip posseder in grad da garanzia d'almain 100 pertschient. Cun la finanziaziun restanta da la cassa da pensiun dal Grischun ch'è vegnida fatga vegn ademplida questa premissa uschè bain sco pussaivel.

En cumparegliaziun cun il project da consultaziun èn vegnidas integradas duas ulteriuras disposiziuns en la missiva da la regenza: Uschia duain en l'avegnir vegnir elegidas las represchentanzas dals lavurants en la cumissiun administrativa cumponida en moda paritetica da tut las collavuraturas e da tut ils collavuraturs. Ultra da quai cuntegna la lescha da nov il renviament che las disposiziuns da la lescha davart la giurisdicziun administrativa èn applitgablas en cas da dispita tranter l'instituziun da prevenziun, las patrunas ed ils patruns e persunas autorisadas da far pretensiuns. Questa disposiziun serva a la persuna che tschertga dretg sco orientaziun. 

Il futur sto vegnir garantì
Il cussegl grond vegn a tractar la revisiun totala da la lescha davart la cassa da pensiun chantunala dal Grischun en la sessiun d'avrigl 2013. Suenter la debatta al vegn suttamess in project che duai segirar en l'avegnir las prestaziuns da rentas da la cassa da pensiun. En il center vegn a star l'introducziun da mesiras accumpagnantas. Questas duain gidar che las prestaziuns da rentas possian vegnir tegnidas sin il nivel da fin uss, malgrà las tariffas da conversiun pli bassas.

Er per in'uschenumnada instituziun da prevenziun "enpleganta" sco quella dal chantun che porscha ina prevenziun che surpassa il minimum da la lescha, sto la tariffa da conversiun vegnir fixada stringentamain tenor criteri da la tecnica d'assicuranza. Uschia ha reducì la cumissiun administrativa da la cassa da pensiun dal Grischun la tariffa da conversiun per ils 31 da december 2012 dad actualmain 6,55 pertschient a 6,05 pertschient per la vegliadetgna da 65 onns. Il medem mument èn vegnidas fixadas regulaziuns transitoricas per las annadas ch'èn en la vischinanza da la vegliadetgna da pensiun che mitigeschan u minimiseschan las consequenzas negativas per questas annadas. 

Contribuziuns sur il minimum legal
En la prevenziun professiunala vegn duvrada la tariffa da conversiun per midar il dabun da vegliadetgna en ina renta annuala. La tariffa da conversiun minimala fixada da la confederaziun (a partir da l'onn 2014 per umens e per dunnas 6,8 pertschient) po vegnir sutpassada d'instituziuns da prevenziun enplegantas sco la cassa da pensiun dal Grischun, uschè ditg che las contribuziuns furnidas correspundan almain a las prescripziuns legalas.

Per ils 31 da december 2012 eran assicuradas tar la cassa da pensiun dal Grischun circa 7800 persunas activas da 220 patrunas u da patruns ch'èn commembras e commembers da la cassa da pensiun dal Grischun. La summa dals salaris importava var 485 milliuns francs. Questas persunas assicuradas activas èn confruntadas cun var 3000 persunas che retiran ina renta. 
 

Infurmaziuns:
cussegliera guvernativa Barbara Janom Steiner, scheffa dal departament da finanzas e vischnancas, tel. 081 257 32 01


Gremi: regenza
Funtauna: rg chanzlia chantunala dal Grischun