La nova exposiziun "Punct da vista" en il museum d'art dal Grischun a Cuira è deditgada a "150 onns fotografia d'architectura en il Grischun". Dals 16 da favrer fin ils 12 da matg 2013 dat l'exposiziun invista dal svilup da l'architectura dal chantun. Per quest intent pudais Vus vesair sut www.gr.ch in nov video da la chanzlia chantunala.

Il Grischun posseda ina cultura architectonica fitg sviluppada ch'el tgira fin al di dad oz. Adina puspè procura la cuntrada specifica per sfidas spezialas, e fin al di dad oz è sa sviluppà in agen discurs architectonic. Quest discurs è vegnì reflectà cuntinuadamain durant ils ultims 150 onns en la fotografia. L'istorgia da la fotografia en il Grischun cumenza cun il turissem. Per l'ina ha il turissem purtà cun sai la fotografia, per l'autra han ins er stuì dumagnar incumbensas da construcziun spezialas pervia da l'avertura stradala e turistica. Questas incumbensas han puspè procurà per motivs attractivs per il fotograf. Sco che l'architectura ha survegnì durant ils ultims 150 onns ina gronda independenza en il chantun, è er la fotografia s'emancipada. Ed entant che las structuras d'abitadi ch'eran creschidas istoricamain èn vegnidas midadas rasantamain durant il 20avel tschientaner, hai gì num da dumagnar quest svilup en l'architectura ed en ils maletgs, e da chattar ina nova lingua per omadus champs.

En l'exposiziun cumplessiva sa tracti da mussar e d'analisar il svilup da l'architectura en il chantun Grischun, uschia sco ch'el vegn intermedià tras la fotografia. Tge incumbensas da construcziun stattan en il center e tge aspect han ellas sin il maletg fotografic? Tge midadas sa laschan observar durant ils ultims 150onns? Perquai che l'architectura e la fotografia giogan ina rolla centrala en il chantun Grischun dapi il 19avel tschientaner e perquai ch'ellas dattan la tempra al maletg da quest chantun, gida l'exposiziun ad elavurar ina part impurtanta da l'istorgia culturala ed a medem temp ad intermediar anoravers in pau da l'identitad culturala.

La vernissascha publica da l'exposiziun ha lieu damaun, venderdi, ils 15 da favrer 2013,
a las 18.00. 

Remartga:
Il video davart l'exposiziun stat a disposiziun sut www.gr.ch. 


Infurmaziuns:
Stephan Kunz, directur dal museum d'art dal Grischun, tel. 081 257 28 61


Gremi: museum d'art dal Grischun
Funtauna: rg museum d'art dal Grischun