Il chantun Grischun è sin la meglra via da surpigliar ina rolla directiva en l'agroturissem svizzer. Gia 120 purschiders d'agroturissem sa preschentan sin la plattafurma da reclama graubuenden.ch/bauernhof. Uschia èn var 50 fin 60 % da tut ils purschiders da vacanzas sin bains purils grischuns online. Ils 14 da mars ha lieu en il Plantahof a Landquart la dieta d'agroturissem annuala.

Vacanzas sin il bain puril e durmir en il strom vegnan mess a pèr cun vacanzas en ina natira intacta, en contact cun animals e cun plantas. Las visitadras e ils visitaders han la pussaivladad d'emprender ad enconuscher la "vita purila simpla", da viver in pèr dis cun la famiglia da purs, da far sezzas u sezs tschertas lavurs e da chattar sasez cun renunziar sapientivamain al luxus. Products dal bain puril resp. spezialitads regiunalas daventan adina pli populars e vegnan tschertgads adina pli savens. Il chantun Grischun vuless prender ina posiziun directiva en l'agroturissem da la Svizra. Cun endrizzar in secretariat ha il chantun Grischun creà mez da l'onn 2011 in post da consultaziun cuminaivel per puras e per purs, ma er per l'hotellaria, per la gastronomia e per organisaziuns turisticas.
Actualmain sa preschentan var 120 manaschis grischuns che porschan in agroturissem sin la plattafurma da reclama www.graubuenden.ch/bauernhof ch'è vegnida sviluppada da nov. Uschia èn var 50 fin 60 % dals purschiders professiunals grischuns online. L'agroturissem dat a famiglias da purs la pussaivladad da realisar entradas supplementaras. Blers mussan excellentamain ils avantatgs da lur bains purils e sa fan per part valair cun purschidas originalas. Latiers tutgan concepts extraordinaris da vacanzas sco il pernottar en jurtas mongolas, en tipis u en chars da vitgira, trekking cun animals ed ina festa patgifica sin in'alp d'aventura. Il factur cuminaivel da questas purschidas è ina maschaida d'ina cumparsa professiunala e d'ina ospitalitad purila genuina. Manaschis, dals quals las purschidas na figureschan anc betg sin quella plattafurma, èn envidads da s'annunziar per daventar uschia meglier visibels e cudeschabels.
La gievgia, ils 14 da mars 2013, ha lieu la dieta d'agroturissem annuala da las duas branschas "agricultura" e "turissem" gia per la tschintgavla giada. Al Plantahof a Landquart sa scuntran puras e purs cun turisticras e turistichers per discutar las sinergias da l'agricultura e dal turissem. 

Remartga:
Davart quest tema stat a disposiziun in video sut www.gr.ch. 

Agiunta:
Program da la dieta dals 14 da mars 2013 al Plantahof 
 

Infurmaziuns:
- Aurelio Casanova, manader da l'uffizi d'agricultura e da geoinfurmaziun, tel. 081 257 24 31
- Christof Dietler, mainagestiun da l'agroturissem dal Grischun, tel. 081 250 54 25


Gremi: departament d'economia publica e fatgs socials
Funtauna: rg departament d'economia publica e fatgs socials