Dals 12 d'avrigl fin ils 29 da settember 2013 mussa il museum da la natira dal Grischun in'exposiziun speziala davart la fauna da peschs da la Svizra. Las visitadras ed ils visitaders pon sfunsar en il mund subaquatic fascinant e sa laschar purtar tras ils differents spazis da viver dals peschs, e quai davent da l'aual da muntogna fin en la mar. Ina impressiun da l'exposiziun dat in nov video da la chanzlia chantunala dal Grischun sut www.gr.ch. 

Cun ina vernissascha publica, ils 11 d'avrigl 2013, avra il museum da la natira dal Grischun ina nova exposiziun speziala "PesCHs". Questa exposiziun è deditgada a la fauna dals peschs ch'exista da l'aual da muntogna fin en la mar. En la nova exposiziun speziala en il museum da la natira dal Grischun hai l'emprim ina giada num trair flad: Ensemen cun ils "pesCHs" sfunsan las visitadras ed ils visitaders en il mund subacquatic fascinant da la Svizra. In'exposiziun viva e per part decorada cun in premi internaziunal preschenta passa 50 spezias da peschs da la Svizra en lur spazi da viver respectiv. La frilla e la lampedra pitschna pauc enconuschenta nodan ensemen en l'aual da muntogna, il glischun, il scardun e la blicca sa zuppan en la channa, las spezias da peschs cun colurs discretas sco il silur, la lota e las bramas vivan en il funs dal lai.
Ils preparats ch'èn vegnids producids cun grond quità èn il punct culminant da questa exposiziun ch'è vegnida realisada dal museum da la natira da Soloturn. Els vegnan accumpagnads da numerus elements ludics sco in gieu davart la migraziun dal salmun, che dovra ina gronda sensibilitad per arrivar tar las plazzas da fregar, ubain ina chascha cun vuschs da peschs che metta en evidenza che peschs n'èn betg simplamain mits. Il grond pesch da la paraula «Wuhubari» metta a disposiziun spezialitads per l'entira famiglia ed è in punct culminant en spezial per ils giasts giuvens dal museum. La finala pon las pestgadras ed ils pestgaders versads e futurs bitschar la ritscha gist tuttina sco las autras visitadras ed ils auters visitaders.

La vernissascha publica da l'exposiziun ha lieu oz, gievgia, ils 11 d'avrigl 2013, a las 19.15 en la sala Brandis sper il museum da la natira. 

Remartga:
Il video davart l'exposiziun stat a disposiziun sut www.gr.ch. 
 

Infurmaziuns:
Ueli Rehsteiner, directur dal museum da la natira dal Grischun, Tel. 081 257 28 43
Flurin Camenisch, pedagog da museum, Tel. 081 257 28 45 


Gremi: museum da la natira
Funtauna: rg museum da la natira