Bunamain 300 000 persunas en Svizra èn dependentas d'alcohol. Gist perquai ch'il consum d'alcohol è socialmain acceptà, èsi per bleras persunas pertutgadas difficil da discurrer surlonder. Per rumper quest tabu ha lieu la fin da matg en l'entira Svizra l'emna da dialog d'alcohol, tar la quala il chantun Grischun sa participescha er.

Giudair l'alcohol cun responsabladad n'è betg simpel per tut ils umans. Da discurrer davart l'alcohol – senza d'al diabolisar – quai è la finamira da l'emna da dialog che ha lieu dals 18 fin ils 26 da matg 2013 en l'entira Svizra. L'emna da dialog fa part da la campagna da prevenziun d'alcohol che metta en gir la discussiun là, nua ch'ils problems èn sensibels: directamain tar ils umans. Uschia duai reussir da rumper il tabu. L'emna da dialog sut il motto "Jau discur da l'alcohol" è ina nova moda da prevenziun d'alcohol.
Il chantun Grischun rinforza ses engaschament cunter las consequenzas d'in consum d'alcohol smesirà. Uschia ha la regenza approvà dacurt il "Program grischun d'alcohol" (PGA) che dura 4 onns. Latiers tutgan tranter auter la prevenziun en las scolas, in rinforzament da la protecziun da la giuventetgna sco er la lavur da campagnas. Pervia da quai èsi logic ch'er en il Grischun han lieu durant l'emna da dialog differentas occurrenzas davart il tema da l'alcohol. 

Teater, discussiun e films
Gievgia, ils 23 da matg 2013, e venderdi, ils 24 da matg 2013, vegn preschentà mintgamai a las 20.30 en la Confetti-Bar da Cuira (Grabenstrasse 55) il toc da teater "Die Säuferin" da Miriam Fiordeponti che dura 45 minutas. Ils dus auturs Dominik Bernet ("Der grosse Durst") e Werner Färber ("Volle Pulle") fan puspè ina tura tras il chantun. Els discuteschan cun giuvenils en scolas dal stgalim superiur da Sumvitg fin Schiers. Plinavant vegnan mussads films il glindesdi da kino en la "Werkstatt Chur" che tractan la problematica d'alcohol. Ils proxims films han lieu ils 20 da matg 2013 "La Leggenda del Santo Bevitore" d'Ermanno Olmi ed ils 27 da matg 2013 "Trees Lounge" da Steve Buscemi (cumenzament mintgamai a las 20.30).
Tut las occurrenzas en l'entira Svizra èn publitgadas sin la pagina d'internet www.ich-spreche-ueber-alkohol.ch e pon vegnir filtradas tenor chantun, data e gener. Cumplementarmain vegn manada la pagina da Facebook "Top Stories about Alcohol". L'uffizi federal da sanadad publica ed organisaziuns partenarias publitgeschan là infurmaziuns ed elements divertents.
Ulteriurs links:
www.die-saeuferin.com  
www.werkstattchur.ch  
www.dominikbernet.ch  
www.wernerfaerber.de  
 

Infurmaziuns:
Denise Rudin, uffizi da sanadad dal Grischun, tel. 081 257 64 02 u 078 746 42 20, e-mail: Denise.Rudin@san.gr.ch  


Gremi: uffizi da sanadad dal Grischun
Funtauna: rg uffizi da sanadad dal Grischun