La cumissiun predeliberanta dal cussegl grond è s'occupada da la missiva da la regenza concernent las contribuziuns a la renovaziun ed a la restauraziun dal chastè da l'uvestg a Cuira. Ella propona al cussegl grond d'approvar il project.

Sut il presidi da la deputada Beatrice Baselgia-Brunner ed en preschientscha dal cusseglier guvernativ Martin Jäger ha la cumissiun predeliberà la missiva per mauns dal cussegl grond. En il rom d'ina visita guidada tras il chastè da l'uvestg ha ella pudì sa persvader al lieu, ch'il basegn per la renovaziun e per la restauraziun è cumprovà, sch'ins vul mantegnair quest monument cultural d'impurtanza naziunala.

En la missiva concernent las contribuziuns a la renovaziun ed a la restauraziun dal chastè da l'uvestg a Cuira propona la regenza al cussegl grond da conceder in credit d'impegn da 4 030 000 francs, quai vul dir, la confederaziun ed il chantun pajassan mintgamai maximalmain 2 015 000 francs a favur da quellas mesiras che han il dretg da survegnir subvenziuns. Ils custs totals dal project d'exposiziun importan stgars 29 milliuns francs. Ils custs che restan suenter la deducziun da las contribuziuns federalas e chantunalas vegnan a stuair surpigliar la proprietaria dal chastè da l'uvestg, la fundaziun Mensa Episcopalis Curiensis, respectivamain persunas privatas.

Suenter ina discussiun detagliada propona la cumissiun predeliberanta unanimamain al cussegl grond d'acceptar il project e da l'approvar en il senn da la proposta a la regenza. Il cussegl grond vegn a tractar questa fatschenta en la sessiun da zercladur 2013. 
 

Infurmaziuns:
presidenta da la cumissiun Beatrice Baselgia-Brunner, tel. 078 602 18 56


Gremi: cumissiun predeliberanta "Chastè da l'uvestg a Cuira"
Funtauna: cumissiun predeliberanta "Chastè da l'uvestg a Cuira"