En il Grischun han 13 bibliotecaras terminà dacurt lur furmaziun supplementara e survegnì il certificat da la cuminanza da lavur da las bibliotecas svizras da lectura publica (CLP).

En las passa 50 bibliotecas da scola e bibliotecas communalas dal chantun vegn prestada ina lavur da biblioteca cumpetenta. Quai cun il sustegn da la biblioteca chantunala dal Grischun, nua ch'i vegnan purschids regularmain perfecziunaments correspundents per persunas creschidas. Quests perfecziunaments adempleschan las prescripziuns da qualitad tenor las directivas vertentas da la cuminanza da lavur da las bibliotecas svizras da lectura publica (CLP). Ils curs vegnan organisads da l'incumbensada chantunala da las bibliotecas Nelly Däscher en num da la cumissiun da biblioteca dal Grischun. Il curs fundamental da la CLP terminescha suenter 27 dis d'instrucziun cun in examen.

Dacurt han 13 absolventas survegnì il certificat da la CLP a chaschun da la festa da finiziun. Jürg Simonett, il vicemanader da l'uffizi da cultura e manader dal museum retic, ha gratulà a las collavuraturas da las bibliotecas CLP e las ludà per lur engaschi. Plinavant ha el menziunà ch'ellas possian ussa applitgar lur novas enconuschientschas en lur bibliotecas, ch'èn instituziuns da basa en las vischnancas. I valia la paina da nizzegiar sinergias, da sa preschentar communablamain e da furmar ina rait ensemen cun las autras bibliotecas grischunas. Uschia possian las purschidas ed ils servetschs da las singulas bibliotecas vegnir coordinads optimalmain in cun l'auter.

In certificat han survegnì:
Stefania Cavelti, Cuira; Petra Fallet-Scandella, Müstair; Silvia Führer-Mugglin, Igis; Fabienne Grünenfelder-Plaz, Wangs; Susanne Guntli-Schnider, Heiligkreuz; Madlen Hofstetter-Zangger, Silvaplauna; Brigitte Lippuner, Jenins; Daniela Schindler-Breitenmoser, Mitlödi; Sandra Tanner, Marbach; Ulrica Wieland, Schiers; Claudia Willi, Walenstadt; Martina Willi Bugmann, Domat; Loredana Willy, Zuoz. 


Infurmaziuns:
Elsbeth Bärtsch, biblioteca chantunala dal Grischun / uffizi da cultura, tel. 081 257 28 05, e-mail: elsbeth.baertsch@kbg.gr.ch  
 

Gremi: biblioteca chantunala dal Grischun
Funtauna: rg biblioteca chantunala dal Grischun