Zum Seiteninhalt

Dapli meds finanzials per la cassa da pensiun dal Grischun

  • Erste Mitteilung
  • Neuen Beitrag einfügen
La regenza grischuna propona mesiras per mantegnair respectivamain per betg laschar crudar pli fitg il nivel da las rentas tar la cassa da pensiun dal Grischun. Ella ha avert la consultaziun tar ina revisiun parziala correspundenta da la lescha davart la cassa da pensiun chantunala dal Grischun.

La populaziun svizra vegn adina pli veglia. Dapi che la cassa da pensiun obligatorica è vegnida introducida l'onn 1985, è la durada probabla da la vita a la vegliadetgna da 65 onns s'augmentada per var 4 onns tar ils umens e per 2,5 fin 3 onns tar las dunnas. Quai vul dir ch'il chapital ch'ins ha spargnà en la cassa da pensiun sto tanscher adina pli ditg.

Las tariffas dals tschains d'investiziuns cun paucas ristgas, sco p.ex. per obligaziuns da la confederaziun sa reduceschan dapi onns. Dapi 2 fin 3 onns èn ellas sin in nivel fitg bass. Ils retgavs da las investiziuns da chapital na cuntanschan betg pli las renditas dals decennis anteriurs. Pervia da quests svilups han las cassas da pensiun stuì cumenzar ils ultims 5 fin 7 onns a curreger lur empermischuns da rentas memia autas dals onns precedents ed adattar quellas a la realitad. Da quest trend n'è er la cassa da pensiun dal Grischun (CPGR) betg mitschada. En plirs pass ha la CPGR sbassà dal 2006 fin il 2012 las rentas da persunas novpensiunadas per var 10 pertschient.

Pervia dals svilups menziunads e pervia da novas basas tecnicas ha il tschains tecnic, che vegn duvrà per calcular la renta da vegliadetgna, stuì vegnir sbassà danovamain per ils 31 da december 2012. En consequenza da quai han er stuì vegnir adattadas las tariffas da conversiun che servan a fixar las rentas. Novas rentas da vegliadetgna sa sbassan pia danovamain. La regenza vul dentant mantegnair tant sco pussaivel il nivel da prestaziun per las persunas ch'èn assicuradas tar la CPGR. Perquai propona ella mesiras da sustegn. Igl è previs da prolungar in pau il temp da spargn e d'auzar levamain las contribuziuns da spargn. Igl è previs da cumenzar a spargnar gia en la vegliadetgna da 20 onns (fin ussa 25 onns) e d'augmentar levamain las contribuziuns en la segunda mesadad da la carriera a partir da la vegliadetgna da 45 onns. Il chantun sco patrun sto far quint cun custs supplementars per onn da var 750 000 francs per sias circa 3000 collavuraturas e collavuraturs. La contribuziun da la singula collavuratura u dal singul collavuratur è en media circa 205 francs dapli per onn.

Sin basa da la lescha davart la cassa da pensiun è il legislatur cumpetent per fixar las contribuziuns da spargn. Perquai sto la lescha davart la cassa da pensiun vegnir suttamessa ad ina revisiun parziala, per ch'ins possia introducir las mesiras da sustegn proponidas. La regenza grischuna ha avert la consultaziun en chaussa. 
 

Remartga:
La consultaziun dura fin ils 6 da settember 2013. Ils documents pon vegnir consultads en l'internet sut www.gr.ch / Consultaziuns currentas
 

Infurmaziuns:
cussegliera guvernativa Barbara Janom Steiner, scheffa dal departament da finanzas e vischnancas, tel. 081 257 32 01, e-mail: barbara.janom@dfg.gr.ch  
 

Gremi: regenza
Funtauna: rg chanzlia chantunala dal Grischun
Neuer Artikel