Sco consequenza da la refurma dal territori en il chantun Grischun ston er vegnir adattadas las structuras dals circuls da scussiun e da concurs. La regenza ha lantschà la consultaziun tar ina lescha introductiva tar la lescha federala davart la scussiun ed il concurs. Proponì vegn in model cun in circul da scussiun e da concurs per regiun.
Cun la refurma dal territori en il Grischun vegnan schliads ils circuls sco corporaziuns da dretg public cun agens organs. Las 14 corporaziuns regiunalas ed ils 11 districts vegnan remplazzads tras 11 regiuns. Questa reorganisaziun dal plaun statal d'amez ha er ina influenza sin ils fatgs da scussiun e da concurs en il Grischun. Oz furma mintga circul politic in circul da scussiun e mintga district in circul da concurs. Dus u plirs circuls respectivamain districts pon però unir la gestiun e l'administraziun dals uffizis da scussiun e da concurs. Quai è gia vegnì fatg, uschia ch'igl existan actualmain anc 25 circuls da scussiun en il chantun.
En in sboz tar la lescha introductiva tar la lescha federala davart la scussiun ed il concurs ha la regenza preschentà sia proposta per concepir da nov ils circuls da scussiun e da concurs. En il futur duai pia mintga regiun furmar in circul da scussiun e da concurs. Cun quai duai er vegnir abolida la separaziun da las duas instanzas. Questa separaziun n'è betg sa cumprovada en la pratica. Las regiuns duain pudair decider sezzas, sch'ellas vulan unir lur uffizis da scussiun e da concurs sin plaun surregiunal. Ultra da quai duain ellas avair la pussaivladad d'endrizzar filialas. Tge organisaziun ch'ils uffizis da scussiun e da concurs duain avair, duain reglar las regiuns. Tscherts princips vegnan però reglads en moda unitara en la lescha.
En il sboz da consultaziun vegn er preschentada in'alternativa tar quest model da structura. Tenor quella duain vegnir stgaffids 11 circuls da scussiun regiunals ed in circul da concurs chantunal. En vista al fatg che incumbensas quasi-giudizialas ed administrativas duain vegnir surdadas tras la refurma dal territori a las regiuns stgaffidas da nov preferescha la regenza però la soluziun cun 11 circuls da scussiun e da concurs.
Actualmain èn las disposiziuns executivas vertentas tar la lescha federala davart la scussiun ed il concurs fixadas sin il stgalim d'ina ordinaziun. Cun la nova lescha introductiva tar la lescha federala duai vegnir stgaffida la finala ina soluziun confurma a la constituziun.
Remartga:
La consultaziun dura fin ils 13 da settember 2013. Ils documents pon vegnir consultads en l'internet sut
www.gr.ch / Consultaziuns currentas.
Infurmaziuns:
cusseglier guvernativ dr. Christian Rathgeb, schef dal departament da giustia, segirezza e sanadad dal Grischun, tel. 081 257 25 01,
christian.rathgeb@djsg.gr.ch
Gremi: regenza
Funtauna: rg chanzlia chantunala dal Grischun