Navigation

Inhaltsbereich

  • Erste Mitteilung
  • Neuen Beitrag einfügen
La regenza grischuna preschenta al cussegl grond la missiva tar ina revisiun parziala da la lescha chantunala da pestga. Tras questa revisiun parziala duain vegnir realisadas pliras novaziuns modernas sin il champ da la pestga. Ultra da quai èsi necessari d'adattar la lescha chantunala a la legislaziun federala.

La legislaziun chantunala da pestga vertenta è sa cumprovada da princip. Cun la revisiun parziala da la lescha chantunala da pestga duain dentant intginas disposiziuns modernas vegnir recepidas en la lescha. I sa tracta tranter auter dal dretg da pestgar sut surveglianza, da las taxas da patenta per giuvenils, dal scumond d'entrar guatond en las auas, da la determinaziun d'auas d'exercizi per la scolaziun da pestgadras e pestgaders novs sco er da mesiras da promoziun.

En cumparegliaziun cun il project da consultaziun ha la regenza fatg mo paucas correcturas en sia missiva al cussegl grond. Uschia vegn abolì sco previs il scumond vertent d'entrar guatond en las auas per exequir la pestga, ma la regenza po restrenscher localmain e temporarmain il dretg d'entrar guatond en las auas per la pestga, e quai betg mo en l'interess dal cuaditsch dals peschs, mabain er en l'interess da la gnivaziun dals utschels. I vegn desistì da reglar en moda pli rigurusa las mesiras da cumpensaziun che vegnan fatgas sco indemnisaziun per las intervenziuns tecnicas en las auas. Uschia na duai betg vegnir considerada sco decisiva per l'indemnisaziun – ultra da la sminuziun da la productivitad da las auas da peschs – er anc la sminuziun dal spazi da viver per ils animals da l'aua. 

La generaziun giuvna da pestgadras e pestgaders vegn sustegnida
Il project cuntegna ultra da quai las suandantas disposiziuns: Il dretg da pestgar sut surveglianza autorisescha da nov dus giuvenils fin 13 onns d'exequir la pestga sut la surveglianza d'in titular da la patenta maioren cun attest davart las enconuschientschas da la materia. L'attest davart las enconuschientschas da la materia è la conferma ch'ina pestgadra u in pestgader ha absolvì la furmaziun da basa necessaria. L'attest davart las enconuschientschas da la materia vegn premess sco fin ussa per retrair ina patenta per ina stagiun u per in mais. Da nov vegnan las taxas da patenta per giuvenils fin 18 onns reducidas per la mesadad (fin ussa fin 16 onns). Per scolar pestgadras e pestgaders novs po la regenza determinar da nov auas d'exercizi. Ultra da quai survegn il chantun dapli libertad d'agir per promover la pestga. El po prender sez mesiras u conceder contribuziuns per quai a terzas persunas.

Ultra da questas novaziuns vegn il dretg chantunal da pestga adattà a la legislaziun federala surordinada davart la protecziun dals animals. En la lescha vegnan abolidas differentas disposiziuns che concernan il tractament da peschs e da giombers en ina moda che als correspunda, sco ch'el è reglà suffizientamain en il dretg federal.

Il cussegl grond vegn a tractar la fatschenta en la sessiun d'avust 2013. 


Remartga:
Davart quest tema stat a disposiziun in video sut www.gr.ch.
 

Infurmaziuns:
dr. Mario Cavigelli, schef dal departament da construcziun, traffic e selvicultura, tel. 081 257 36 01, e-mail: Mario.Cavigelli@bvfd.gr.ch  
 

Gremi: regenza
Funtauna: rg chanzlia chantunala dal Grischun
Neuer Artikel