Oz vegn averta la villa d'uffants a Cuira en preschientscha da las pitschnas lavureras e dals pitschens mastergnants. Il project da construcziun "Villa d'uffants" è ina purschida speziala da l'intermediaziun d'art ch'è vegnida sviluppada en il rom da l'exposiziun "Uninhabitable Objects" dal museum d'art dal Grischun.

Suenter passa tschintg emnas da lavur intensiva cun bler plaschair vegn la villa d'uffants terminada ed averta oz, ils 5 da fanadur. Nov classas da differents lieus e da differentas valladas sco er ina gruppa d'uffants che han lavurà durant lur vacanzas vi da la villa èn responsablas per l'edifizi. Fitg svelt han ils uffants emprendì da duvrar ils utensils, da sa cuntegnair cun responsabladad sin il plazzal e da realisar ensemen lur ideas davart las stanzas e davart l'abitar. La visita da l'exposiziun "Uninhabitable Objects", che ha gì lieu mintga damaun, ha servì sco inspiraziun, ma suenter èn stadas dumandadas las atgnas ideas. A la festa publica da ventschida per la villa d'uffants dals 5 da fanadur, a las 17.00, èn envidads tut las architectas e tut ils impressaris, lur fragliuns, geniturs, camaratas e camarats, ma er tut las persunas interessadas sco er tut las amias e tut ils amis dal museum d'art. Suenter questa festa stat la villa d'uffants anc a disposiziun fin a la fin da l'exposiziun ils 25 d'avust sco plazza da giugar per las pitschnas visitadras ed ils pitschens visitaders. Questa purschida particulara d'intermediaziun dal museum d'art dal Grischun è vegnida organisada da l'intermediatura d'art Alexa Giger ensemen cun la curatura Katharina Ammann. 

Remartga:
Davart quest tema stat a disposiziun in video sut www.gr.ch. 


Infurmaziuns:
Katharina Ammann, conservatura dal museum d'art dal Grischun, tel. 081 257 28 62, e-mail katharina.ammann@bkm.gr.ch  


Gremi: museum d'art dal Grischun
Funtauna: rg museum d'art dal Grischun