Zum Seiteninhalt

Il cusseglier guvernativ Cavigelli ed il selvicultur chantunal Hefti sa deditgeschan al territori da cots e giaglinas da taus e da draussa en ils guauds dal Grischun central

  • Erste Mitteilung
  • Neuen Beitrag einfügen
Il cusseglier guvernativ Mario Cavigelli, schef dal departament da construcziun, traffic e selvicultura, ed il selvicultur chantunal Reto Hefti han visità dacurt il center regiunal da l'uffizi da guaud e privels da la natira a Casti. Ultra d'in barat informal cun il team sco er davart l'organisaziun da la regiun forestala Grischun central/Moesano han pudì vegnir discutadas en spezial dumondas e tematicas forestalas specificas per la regiun.

En il center da l'excursiun specifica en ils guauds da la vischnanca d'Alvagni n'è per ina giada betg stada la tgira dal guaud da protecziun, mabain la biodiversitad forestala ed il spazi da viver pretensius per ils cots e las giaglinas da taus e da draussa, il pli gronds utschels da guaud che vivan en Svizra. Cun questa chaschun han il manader regiunal Christian Barandun sco er sias collavuraturas e ses collavuraturs da la regiun forestala Grischun central/Moesano pudì mussar en moda impressiunanta, co ch'ils spazis da viver da quests abitants periclitads da noss guauds pon vegnir mantegnids e promovids cun success, sch'il guaud vegn tgirà cun cleras intenziuns.
Ultra da mesiras intenziunadas a favur d'ina tscherta spezia d'animals han plinavant er guauds rars, che vegnan da preferenza pasculads, ina impurtanza generala per la biodiversitad. Il manader regiunal Barandun ha explitgà quai a maun da l'exempel reussì da las pastgiras e da las pastgiras da guaud en il territori da las Aclas d'Alvagni. Quellas han survegnì dapli glisch ils ultims onns cun mesiras forestalas ed uneschan en moda exemplarica ils interess da l'agricultura, da la selvicultura e da la protecziun da la natira.
La regiun forestala Grischun central/Moesano cun il center regiunal a Casti e cun il post extern a Roveredo è la pli gronda da las tschintg regiuns forestalas en il chantun Grischun ed occupa indesch collavuraturas e collavuraturs. 


Infurmaziuns:
Reto Hefti, manader da l'uffizi da guaud e privels da la natira / selvicultur chantunal, tel. 079 659 69 18, e-mail Reto.Hefti@afw.gr.ch  


Gremi: uffizi da guaud e privels da la natira
Funtauna: rg uffizi da guaud e privels da la natira
Neuer Artikel