La planisaziun per il svilup dal guaud è ina basa indispensabla per cultivar e per tgirar il guaud en il chantun Grischun. La cooperaziun da las vischnancas sco er da la publicitad gioga qua ina rolla impurtanta. Da nov duain ils 20 plans per il svilup dal guaud (PSG) existents vegnir remplazzads tras tschintg novs PSG regiunals.

En il Grischun appartegna la gronda part dal guaud a las vischnancas (85 pertschient). Uschia pervegn ina hectara guaud a mintga abitanta e mintga abitant. Quest "possess" sto vegnir mantegnì. Planisar per il futur è la devisa. Il plan per il svilup dal guaud (PSG) surpiglia questa incumbensa. El è l'instrument central da planisaziun e da direcziun dal servetsch forestal chantunal. El garantescha ils interess publics multifars vi dal guaud – sco protecziun cunter privels da la natira, producziun da laina, natira e cuntrada, recreaziun e turissem, agricultura, spazi da viver per la selvaschina ed infrastructuras – e procura per in'utilisaziun a lunga vista e persistenta dal guaud.

Da l'onn 1996 fin l'onn 2009 èn vegnids fatgs tals plans per tut las vischnancas dal chantun Grischun, exceptà per quellas da la regiun da l'Engiadin'ota e da la Val Bregaglia. Il december 2011 è entrada en vigur per l'entira Svizra ina nova determinaziun dal guaud da protecziun ch'è vegnida fixada tenor criteris unitars. En in chantun da muntogna sco il Grischun è la protecziun cunter privels da la natira ina da las funcziuns las pli impurtantas dal guaud. L'elavuraziun da quest fegl d'object ha pia consequenzas per tut ils fegls d'object en il plan per il svilup dal guaud. L'uffizi da guaud e privels da la natira (UGP) vegn perquai incumbensà da suttametter ils plans per il svilup dal guaud ad ina revisiun totala. 

Ils PSG existents vegnan remplazzads tras tschintg novs PSG
Ils PSG existents vegnan repassads sut la direcziun dal servetsch forestal chantunal e cun la cooperaziun da las vischnancas sco er da la populaziun. Per quest intent vegni sa basà sin las enconuschientschas vertentas dal servetsch forestal local. Ma i duain er vegnir resguardads ils giavischs existents da las vischnancas e da la publicitad. La finanziaziun vegn surpigliada dal chantun. Ils 20 PSG existents vegnan remplazzads tras mintgamai in plan per il svilup dal guaud per regiun da guaud (Signuradi-Partenz-Tavau, Val dal Rain/Scanvetg, Surselva, Grischun central-Moesano, Grischun dal sid). Tuts tschintg PSG duain esser terminads fin la fin da l'onn 2016. 

Infurmaziuns per la populaziun
Represchentantas e represchentants da las vischnancas e persunas interessadas pon s'infurmar davart il cuntegn, davart il decurs e davart las pussaivladads da cooperar sut www.wep.gr.ch. 


Infurmaziuns:
- Urban Maissen, substitut dal selvicultur chantunal, uffizi da guaud e privels da la natira, tel. 081 257 62 80, e-mail: urban.maissen@awn.gr.ch  
- dr. Riet Gordon, manader dal sectur per l'infurmaziun davart il guaud, uffizi da guaud e privels da la natira, tel. 081 257 38 55, e-mail: riet.gordon@awn.gr.ch  
 

Gremi: uffizi da guaud e privels da la natira
Funtauna: rg uffizi da guaud e privels da la natira