L'incumbensà federal spezial per la collavuraziun transcunfinala, Hans Jakob Roth, ha visità oz, sin invitaziun dal chancelier Claudio Riesen, il Grischun. Ils temas da la scuntrada èn stads la rolla dals chantuns en la politica exteriura e dumondas actualas da las regiuns da cunfin.

Per la collavuraziun transcunfinala èn cumpetents ils chantuns. La constituziun federala permetta als chantuns da far ina politica exteriura activa. Da questa libertad d'agir profita il chantun Grischun cun schliar dumondas transcunfinalas en il rom da las structuras internaziunalas e cun tgirar ina vasta rait flexibla. En il rom dals gremis transcunfinals, sco la cuminanza da lavur da las regiuns alpinas (ARGE ALP), la cumissiun internaziunala da las regenzas Rain alpin (CIRRA) e l'Interreg administrescha il Grischun spazis da viver cuminaivels tranter auter cun il Tirol dal sid, cun il Tirol, cun il Vorarlberg e cun la Lumbardia. L'entretschament pli e pli intensiv dals spazis economics e dals spazis da viver cun l'exteriur vischin chaschuna in basegn creschent d'ina collavuraziun transcunfinala. Sin quest champ gidan ils chantuns da cunfin, sco il Grischun, decisivamain a realisar la politica exteriura. En sia strategia concernent la politica exteriura 2012 fin 2015 ha il cussegl federal declerà las relaziuns cun las regiuns da cunfin sco ina prioritad ed ha nominà cun Hans Jakob Roth sco incumbensà spezial per las dumondas transcunfinalas. L'incumbensa da Roth è da promover il barat cun ils chantuns e da sustegnair ils chantuns. L'Europa creschia ensemen cunzunt en las regiuns da cunfin, uschia che las regenzas chantunalas e localas vegnian involvidas il futur anc pli fitg en la politica exteriura regiunala, ha Roth menziunà a chaschun da la scuntrada dad oz.

Il chancelier Claudio Riesen, ils deputads Alessandro Della Vedova e Maurizio Michael, Eugen Arpagaus da l'uffizi per economia e turissem e Bianca Battaglia, incumbensada per las relaziuns externas, han declerà a Hans Jakob Roth las relaziuns externas multifaras dal chantun Grischun. Discutads èn vegnids temas sco la Expo 2015 a Milaun, ils projects d'Interreg e l'engaschament dal Grischun per crear ina strategia europeica concernent las Alps. La scuntrada ha furmà la basa per in barat futur pli intensiv.


Fotografia agiuntada:

da sanestra: Eugen Arpagaus (uffizi per economia e turissem), deputà Allessandro Della Vedova, incumbensà spezial Hans Jakob Roth, chancelier Claudio Riesen, deputà Maurizio Michael, Bianca Battaglia (chanzlia chantunala)


Infurmaziuns:
chancelier Claudio Riesen, tel. 081 257 22 23, e-mail claudio.riesen@staka.gr.ch  


Gremi: chanzlia chantunala dal Grischun
Funtauna: rg chanzlia chantunala dal Grischun