Zum Seiteninhalt

Val Mesauc: La polizia chantunala metta autras prioritads d'acziun

  • Erste Mitteilung
  • Neuen Beitrag einfügen
En differentas parts dal Grischun èn ils enguladitschs cun infracziun s'augmentads ils ultims onns. La polizia chantunala dal Grischun ha reagì gia la primavaira sin quai ed ha mess sias prioritads d'acziun a favur da las activitads da la polizia criminala e da segirezza. L'activitad da controlla en la Val Mesauc e la collavuraziun cun la polizia chantunala dal Tessin e cun l'Italia èn vegnidas intensivadas.

Gia a la conferenza da medias davart la statistica criminala 2012 il mars 2013 èsi vegnì fatg attent als enguladitschs cun infracziun pli e pli frequents en la Val Mesauc, en Surselva ed en la Val dal Rain. Sin quai ha la polizia chantunala dal Grischun reagì e lantschà differentas acziuns. En la Val Mesauc èn uschia per exempel vegnidas fatgas cun cleras finamiras controllas da la polizia criminala e da segirezza la saira e la notg e la preschientscha da la polizia è vegnida augmentada. Las singulas mesiras duran anc adina e fan effect. 

Betg in fenomen grischun
Las retschertgas da la polizia han mussà ch'ils delinquents èn per gronda part burgais da la Rumenia e da la Moldavia. Ins sto partir dal fatg che questas persunas entrian da l'Italia en Svizra sur in passagi dal cunfin senza guardias e bandunian pauc pli tard puspè la Svizra sin questa via. L'augment dals enguladitschs cun infracziun è in fenomen svizzer che pertutga tut las regiuns da cunfin. 

Collavuraziun internaziunala
Ultra d'augmentar la preschientscha da la polizia en las valladas pertutgadas collavura la polizia chantunala dal Grischun pli e pli er sin plaun interchantunal ed internaziunal. Uschia èn vegnidas creadas patruglias ensemen cun la polizia chantunala dal Tessin ed ina plattafurma per il barat d'infurmaziuns cun l'Italia. La situaziun vegn giuditgada regularmain da nov e las acziuns da la polizia vegnan adattadas permanentamain a las novas enconuschientschas. 

I vegn pretendì ina gruppa d'acziun mobila
Il success il pli grond avess – ord vista da la polizia – ina gruppa d'acziun mobila speziala che pudess vegnir engaschada en moda flexibla e che fiss dispensada dal mintgadi polizial. Quai avess per consequenza ch'il dumber da polizistas e polizists stuess vegnir augmentà. Il schef dal departament da giustia, segirezza e sanadad, cusseglier guvernativ Christian Rathgeb, beneventa las mesiras che la polizia chantunala dal Grischun ha prendì dapi questa primavaira cunzunt en la Val Mesauc, dentant er en tut las autras parts dal chantun. Il departament examinescha il basegn d'ulteriuras forzas d'acziun resp. d'ina gruppa d'acziun mobila. 
 

Infurmaziuns:
cusseglier guvernativ Christian Rathgeb, schef dal departament da giustia, segirezza e sanadad, tel. 081 257 25 01, e-mail Christian.Rathgeb@djsg.gr.ch


Gremi: departament da giustia, segirezza e sanadad
Funtauna: rg departament da giustia, segirezza e sanadad
Neuer Artikel