Il chantun Grischun realisescha – ensemen cun il principadi da Liechtenstein e cun il stadi federativ austriac Vorarlberg – il project d'interreg "concerna: rollas fixas".

A partir da quest mais pon sa participar giuvenils e persunas giuvnas creschidas tranter 14 e 25 onns en il rom d'in project d'interreg ad ina interrogaziun online che porta il titel "Tge pensas ti da rollas fixas en la professiun ed en la famiglia?". L'interrogaziun sa referescha a temas sco: tenutas, rollas fixas, cumportaments da rolla e giavischs per il futur. Il referat da dunnas, il post da stab per l'egualitad da las schanzas dal chantun Grischun ed il post da stab per l'egualitad da las schanzas dal Liechtenstein han incumbensà la scola auta spezialisada da Son Gagl en cooperaziun cun l'institut da perscrutaziun sociala D. Baumgartner, Turitg, da far questa interrogaziun online. Entrada a l'interrogaziun: www.rollenbilder.org  

Survista da l'entir project
Ultra da l'interrogaziun online vegn realisada il cumenzament da l'onn proxim ina campagna da publicitad. A partir dal mars 2014 vegn preschentada in'exposiziun ambulanta interactiva davart il tema da las rollas fixas en la lavur, en la cultura, en la furmaziun ed en la sanadad. Ultra da quai vegn purschida ina retscha da referats per multiplicaturas e multiplicaturs. La finamira dal project è quella da sensibilisar la populaziun giuvna per rollas fixas existentas ed innovativas. L'entir project dura dal settember 2012 fin il december 2014. 
 

Agiunta:
fegl sgulant davart il project 
 

Infurmaziuns:
Silvia Hofmann Auf der Maur, manadra dal post da stab per l'egualitad da las schanzas, tel. 081 257 35 71, e-mail: Silvia.Hofmann@stagl.gr.ch  
 

Gremi: post da stab per l'egualitad da las schanzas dal chantun Grischun
Funtauna: rg post da stab per l'egualitad da las schanzas dal chantun Grischun