Navigation

Inhaltsbereich

  • Erste Mitteilung
  • Neuen Beitrag einfügen
Il premi grischun da cultura 2013 vegn surdà a Martin Bundi. La regenza ha concedì il premi grischun da cultura 2013 sco er nov premis da renconuschientscha e diesch premis da promoziun. Ultra da quai ha la regenza tractà differentas fatschentas da vischnancas e da regiuns. 

Premi da cultura 2013 per Martin Bundi
Martin Bundi vegn undrà da la regenza grischuna cun il premi da cultura 2013. Surdond il premi da cultura 2013 a Martin Bundi undrescha la regenza sias publicaziuns multifaras ed interessantas e sia lavur fritgaivla sco istoricher, politicher da cultura, cumbattant per il rumantsch ed er per la natira, la cultura e l'istorgia en il territori alpin retic. Il premi è dotà cun 30 000 francs.

Plinavant ha la regenza concedì premis da renconuschientscha da mintgamai 20 000 francs ad Elisabeth Arpagaus, Riccarda Caflisch, Ignaz Cathomen, Leza Dosch, Balser Fried, Robert Grossmann, Otto Pajarola, Silke Redolfi e Reto Rigassi.
- Elisabeth Arpagaus survegn il premi en renconuschientscha da sia tschertga nunperturbabla da l'esser e dal misteri da las colurs, ch'ella obtegna or da materials multifars da differentas regiuns dal mund e ch'ella transferescha en tavlas da colur sensiblas.
- Riccarda Caflisch vegn premiada per sias interpretaziuns virtuusas sco flautista, ch'ella munescha cun ina tempra persunala, e per sia occupaziun curaschusa cun musica nova.
- Ignaz Cathomen vegn undrà per sias prestaziuns en favur dal Parc La Mutta a Falera e per ses engaschament perseverant per la lingua e cultura rumantscha.
- Leza Dosch vegn undrà per sia perscrutaziun, inventarisaziun ed intermediaziun voluminusa e cumpetenta da l'art en il Grischun, en spezial da l'architectura dal 19. e 20. tschientaner.
- Balser Fried vegn undrà per sia perscrutaziun cumpetenta e per sia perseveranza en favur dal mantegniment e da la promoziun da l'avieul nair, ina spezia d'avieuls indigens periclitads.
- Robert Grossmann survegn il premi en renconuschientscha da sias prestaziuns durant blers onns sco cumponist, scienzià da musica e sunader d'instruments vegls a pizzico.
- Otto Pajarola vegn undrà per sia documentaziun fotografica dal pajais e dals avdants sco er per sia lavur sco animatur da cultura multifar a Schons.
- Silke Redolfi survegn il premi per sias prestaziuns sco istoricra ed autura e per ses engaschament perseverant en favur da l'archiv da cultura da dunnas dal Grischun.
- Reto Rigassi vegn undrà per sia prestaziun da metter en connex la natira ed il territori cun concepts artistics sofistitgads che interpreteschan e represchentan la realitad en ina lingua universala.

Premis da promoziun da mintgamai 20 000 francs survegnan: Gaudens Bieri, musicist; Laura Bott, artista figurativa; Maurus Gauthier, sautunz; Ursina Giger, musicista; Alessandro Ligato, fotograf; Livio Russi, musicist; Flurina Sarott, musicista; Martin Wildhaber, musicist; Lydia Wilhelm, artista figurativa, sco er Valeria Zangger, musicista.
Ils premis vegnan surdads venderdi, ils 15 da november 2013, a las 17.15, en il rom d'ina festa en la sala dal cussegl grond a Cuira. 

Surpiglià il dretg federal davart il sport da muntogna e da naiv en l'ordinaziun
La regenza ha concludì ina revisiun parziala da las disposiziuns executivas tar la lescha davart il sport da muntogna e da naiv. Qua tras vegnan stgaffidas las disposiziuns chantunalas necessarias per exequir a partir dal 1. da schaner 2014 il nov dretg federal. Ina revisiun da la lescha chantunala davart il sport da muntogna e da naiv duai vegnir fatga en in segund pass, previsiblamain per il 1. da schaner 2016. Fin la fin da l'onn 2015 valan anc transitoricamain las permissiuns chantunalas tenor il dretg vegl resp. las scolaziuns chantunalas renconuschidas en il sport da muntogna e da naiv.
Il nov dretg federal regla differentas activitads (sco guid/-a da muntogna, aspirant/-a da guid da muntogna, magister/-tra da sport da naiv, magister/-tra da rampignar e manader/-dra d'excursiuns; canyoning; riverrafting/canutar en torrents; bungee jumping) che vegnan purschidas professiunalmain en in tschert territori cun in potenzial da privel pli grond (muntogna, territori grippus, auals, flums). Ils chantuns ston reglar las cumpetenzas e las proceduras concernent la permissiun e la persecuziun penala, far las inscripziuns en ina banca da datas e fixar las taxas. Ultra da quai dastgan els relaschar restricziuns d'access per tscherts territoris sco er in inventari da variantas cun turas e cun descensiuns. L'inventari da variantas mussa, tge scolaziun resp. permissiun che vegn premessa tenor il dretg federal per tge varianta da skis. L'inventari n'è betg definitiv e n'ha betg in caracter giuridicamain liant. Turas da skis, da snowboard e da gianellas na figureschan betg en l'inventari da variantas. 

Giuditgà trais ovras electricas en connex cun l'obligaziun da sanar l'aua restanta
Suenter ch'il tribunal federal ha tratg ina sentenzia directiva en il cas da las Ovras electricas Mesauc SA en connex cun la sanaziun da l'aua restanta tenor la lescha federala davart la protecziun da las auas, ha la regenza giuditgà definitivamain trais ulteriuras ovras electricas en il chantun. Da la sanaziun da l'aua restanta da las ovras electricas Mulin (vischnanca da Trin), Schanaus (vischnanca da Lumnezia) e Preda (vischnanca da Bravuogn) vegni desistì. En cas da l'ovra electrica Mulin n'èsi – sin basa dal grad dal disturbi che vegn chaschunà da l'ovra electrica en l'aual pertutgà – betg necessari da sanar l'aua restanta tenor la lescha federala. Las ovras electricas Schanaus e Preda èn dus cas, nua che la sanaziun da l'aua restanta po vegnir taxada – suenter scleriments voluminus – sco exagerada. Las vischnancas sco proprietarias da las ovras electricas vegnan liberadas da l'obligaziun da sanar l'aua restanta. 
 

Da vischnancas e da regiuns 
  • Panaduz: La midada dal plan d'areal 1:2000 "Ginellas – Ruver – Caschners", concludida da la vischnanca da Panaduz ils 22 d'avrigl 2013, vegn approvada. Qua tras vegn deliberada la segunda etappa da surbajegiada. En il territori "Ruver" sa tracti d'ina surfatscha da circa 1,74 hectaras ed en il territori "Caschners" da circa 0,64 hectaras.
  • Churwalden: Il plan general d'avertura 1:2000 "Traffic, Parpan / Stettli", concludì da la vischnanca da Churwalden ils 27 da settember ed ils 2 d'october 2012, vegn approvà cun resalva. La procedura d'approvaziun per las rutas da velos da muntogna vegn sistida en la revisiun totala da la planisaziun locala, fin ch'ils ulteriurs plans generals d'avertura èn approvads.
  • Puschlav: A la vischnanca da Puschlav vegn garantida ina contribuziun chantunala da maximalmain 130 680 francs per reparar ils donns vi da la via champestra Clüs-Campel, traject Vestac da Capitul. Quai cun resalva d'ina contribuziun federala. La vischnanca vegn obligada da pajar 13 pertschient vi da la contribuziun chantunala.
  • Samignun: Il project per construir in passape per lung da la via da Samignun, ordaifer il vitg da Samignun, traject tancadi Clis da Ravaisch fin a la plazza da parcar Riva, vegn approvà. Als custs vegn garantida ina contribuziun chantunala da maximalmain 103 764 francs.
  • Arosa: Per las lavurs da la meglieraziun generala da Lüen vegn concedida ina contribuziun chantunala da maximalmain 2 429 700 francs. Sut la premissa che la confederaziun concedia ina tariffa da contribuziun da 50 pertschient, importa la tariffa chantunala da contribuziun totalmain 35 pertschient.
  • Cazas: A la vischnanca da Cazas vegn garantida ina contribuziun da 51 480 francs per renovar la tschiffada da funtauna 8 "Lescha". Quai cun resalva dal subvenziunament tras la confederaziun.
  • Schiers: A la vischnanca da Schiers vegn garantida ina contribuziun da 209 250 francs per il provediment d'aua "Stelserberg". Quai cun resalva dal subvenziunament tras la confederaziun.

Contribuziuns chantunalas a differentas instituziuns 
  • Fundaziun Pro claustra Son Jon a Müstair: Per la restauraziun da la claustra Son Jon a Müstair, etappa 2013, vegn garantida a la fundaziun Pro claustra Son Jon a Müstair ina contribuziun maximala da 235 000 francs sco mesira da la tgira da monuments.

Projects da vias
La regenza ha approvà in project da vias per reparar la via dal Flüela, traject Pedrawald – Tufflischbach. Sin quest traject da circa 910 meters è la via en in nausch stadi e sto vegnir reparada.
Ultra da quai ha la regenza approvà 1,35 milliuns francs per lavurs da construcziun sin ils suandants trajects:
- via naziunala Partenz: installaziun da ventilaturs d'aria sortinta, sviament da Küblis 
 

Gremi: regenza
Funtauna: rg chanzlia chantunala dal Grischun
Neuer Artikel