Zum Seiteninhalt

Campagna: 10 pass a la sanadad psichica / Tema: Restar en contact cun amias ed amis

  • Erste Mitteilung
  • Neuen Beitrag einfügen
Gievgia, ils 10 d'october 2013, ha lieu per la 22avla giada il di internaziunal da la sanadad psichica. Cun in'acziun lantscha l'uffizi da sanadad dal Grischun quest di la campagna '10 pass a la sanadad psichica'. 

La sanadad psichica pertutga nus tuts
Tenor la statistica survegn en il Grischun mintga segunda persuna en il decurs da sia vita ina malsogna psichica che sto vegnir tractada. Malgrà quai vegnan tabuisadas, sentenziadas e taschentadas memia savens las malsognas psichicas. Quai ha consequenzas negativas per las persunas pertutgadas e per lur conturns persunals. Ils 10 d'october – il di da la sanadad psichica – contribuescha cun differentas activitads per tut il mund enturn a l'infurmaziun, a la destigmatisaziun ed a la sensibilisaziun per ils interess e per ils giavischs da persunas cun ina malsogna psichica e da lur conturns. 

Acziun: Restar en contact cun amias ed amis
Ils 10 d'october 2013 vegn lantschada la campagna grischuna '10 pass a la sanadad psichica'. In dals 10 pass sa numna: 'Restar en contact cun amias ed amis'. L'uffizi da sanadad envida ils 10 d'october – a maun da cartas postalas gia francadas – da tgirar amicizias e da pia far conscientamain in pass a la sanadad psichica. Las cartas gia francadas vegnan distribuidas ils 10 d'october 2013 a Cuira, a Landquart, a Tavau, a Glion, a Roveredo ed a Samedan.

Tras la campagna '10 pass a la sanadad psichica' infurmescha l'uffizi da sanadad dal Grischun las Grischunas ed ils Grischuns davart pussaivladads simplas ed utilas per rinforzar la sanadad psichica ed il bainesser psichic. 

Fatgs
Infurmaziuns da basa davart il program grischun per la sanadad psichica sco er il fegl d'infurmaziun '10 pass a la sanadad psichica' chattais Vus sin la pagina d'internet www.gesundheitsamt.gr.ch, rubrica: sanadad psichica.


Fotografia agiuntada:
Lantschada da la campagna '10 pass a la sanadad psichica': cusseglier guvernativ dr. Christian Rathgeb e Fabienne Brigger, manadra dal program per la sanadad psichica.




Infurmaziuns:
Vitus Demont, uffizi da sanadad dal Grischun, vicemanader, tel. 081 257 26 14, e-mail: vitus.demont@san.gr.ch  


Gremi: uffizi da sanadad
Funtauna: rg uffizi da sanadad
Neuer Artikel