Il chantun Grischun ha realisà quest onn per la sisavla giada ina concurrenza per promover la lavur culturala professiunala per projects pitschens. En tut èn vegnids inoltrads 20 projects.

La concurrenza era vegnida annunziada mez zercladur 2013 en la pressa quotidiana grischuna. Il termin d'annunzia è scadì ils 23 d'avust 2013. Sco commembers da la giuria han Esther Krättli Jenny, presidenta da la cumissiun per concurrenzas da la lavur culturala professiunala (projects gronds) e commembra da la cumissiun chantunala per promover la cultura, Robert Grossmann, commember da la cumissiun per concurrenzas da la lavur culturala professiunala (projects gronds) ed Armon Fontana, promoziun da la cultura dal Grischun, examinà ils 20 projects inoltrads che derivan da differentas spartas culturalas.

Sin recumandaziun da la cumissiun per concurrenzas e sin proposta da l'uffizi da cultura sustegna il departament d'educaziun, cultura e protecziun da l'ambient las suandantas artistas ed ils suandants artists sco er lur projects cun ina contribuziun da mintgamai 10 000 francs: 

• Jaap Achterberg
  sparta: teater
  contribuziun a l'ovra: teater narrativ "Die Entdeckung der Currywurst" 
• Pascal Bergamin
  sparta: film
  contribuziun a l'ovra: svilup dal script "Sommer 61" 
• Marco Luca Castelli
  sparta: teater
  contribuziun a l'ovra: dramatisaziun "Moskau-Petuscki" 
• Kurt Caviezel
  sparta: art figurativ
  contribuziun a l'ovra: "Worldhouse/Houseworld" 
• Mario Giovanoli
  sparta: musica
  contribuziun a l'ovra: "Breaking Sound Barriers With Saxes and Flutes" 
• Konrad Gruber
  sparta: art figurativ
  contribuziun a l'ovra: "the lost five" 
• Romano Pedetti
  sparta: art figurativ
  contribuziun a l'ovra: "Die verschobene Linie oder hinter der Form" 
• Jos Schmid
  sparta: art figurativ
  contribuziun a l'ovra: "Daguerrotypie"

  
Infurmaziuns:
- Barbara Gabrielli, manadra da l'uffizi da cultura, Tel. 081 257 48 01, E-Mail barbara.gabrielli@afk.gr.ch  
- Armon Fontana, promoziun da la cultura dal Grischun, Tel. 081 257 48 02, E-Mail: armon.fontana@afk.gr.ch  
 

Gremi: uffizi da cultura
Funtauna: rg uffizi da cultura