Navigation

Inhaltsbereich

  • Erste Mitteilung
  • Neuen Beitrag einfügen
La regenza grischuna ha deliberà las contribuziuns per la tgira da monuments e tractà differentas fatschentas da vischnancas e da regiuns. 

Deliberà contribuziuns per la tgira da monuments
En il sectur da la tgira da monuments ha la regenza deliberà differentas contribuziuns chantunalas d'ina summa totala dad 832 100 francs. Cun ina contribuziun per mesiras da la tgira da monuments ha ella tranter auter sustegnì la restauraziun generala dal center da cultura Nairs – pli baud la chasa da bogn – da la Fundaziun Nairs a Scuol. Plinavant ha ella resguardà la Fundaziun Pro claustra Son Jon a Müstair per l'etappa 2013 da la restauraziun da la claustra. Er la vischnanca da Seewis survegn ina contribuziun per la restauraziun da las fatschadas e dal tetg da la chasa da scola e communala (pli baud chastè Salis) sco er per la reconstrucziun dal museum d'alp "Alp Fasons". A las vischnancas da Cauco e da Soazza vegnan plinavant concedidas contribuziuns per renovar lur vias e plazzas. 

La ICF sto vegnir reglada da nov
En connex cun la midada da l'ordinaziun d'energia federala per realisar l'iniziativa parlamentara "Deliberaziun da las investiziuns en energias regenerablas senza chastiar ils consuments gronds" renovescha la regenza grischuna sia pretensiun da concepir da nov l'indemnisaziun per cuvrir ils custs da la furniziun d'electricitad (ICF) che sa basa sin la relaziun tranter ils custs ed il niz. Er l'elavuraziun dals instruments da promoziun sto vegnir examinada en il rom da las ulteriuras debattas davart la strategia d'energia 2050 da la confederaziun.
En quai che concerna la midada preschentada da l'ordinaziun d'energia propona la regenza da duvrar ils meds da la ICF che vegnan eventualmain spargnads, sche indrizs fotovoltaics pitschens vegnan – sco previs – indemnisads mo ina giada, per promover ovras idraulicas cun ina prestaziun installada da passa 10 megawatts. 

Midà l'ordinaziun tar la lescha introductiva tar il cudesch da procedura penala svizzer
La regenza ha concludì da far ina revisiun parziala da l'ordinaziun tar la lescha introductiva tar il cudesch da procedura penala svizzer. Tras quella vegn la direcziun professiunala da las agenturas concepida da la procura publica dal Grischun en moda pli flexibla. Quella po surpigliar tant l'emprim procuratur public sco er ses substitut. 
 

Da vischnancas e da regiuns 
  • Claustra-Serneus: La revisiun parziala da la planisaziun locala che sa referescha al project, concludida da la vischnanca da Claustra-Serneus ils 3 da mars 2013, vegn approvada cun cundiziuns. Cun la revisiun parziala vegnan stgaffidas las premissas da la planisaziun d'utilisaziun per installar e per manar ina deponia da material per allontanar material da stgavament nunsmerdà en il territori "In den Erlen" en il sectur da l'entrada dal tunnel dal Veraina da la Viafier retica. Ultra da quai vegn material da stgavament elavurà al lieu.
  • Tarasp: La revisiun totala da la planisaziun locala, concludida da la vischnanca da Tarasp ils 24 da matg 2011, vegn approvada cun resalvas e cun correcturas. Ils meds da planisaziun cuntegnan tranter auter differentas zonas per hotels e zonas da turissem. La procedura d'approvaziun per zonas e per determinaziuns che stattan en connex cun il project per reactivar ed engrondir il territori da skis da Tarasp vegn sistida. Gia il settember 2012 aveva la regenza approvà in'emprima part da la revisiun totala da la planisaziun locala concludida da la vischnanca da Tarasp.
  • Vaz sut: Il plan da zonas e plan general da furmaziun 1:2000 "Vitg" dals 15 da december 2010 vegn approvà er concernent in'enzonaziun da var 0,7 hectaras che cumpiglia differentas parcellas dal territori "Rai".
  • Andeer: Il project "Deposit da laina Parsagna" sin il territori da la vischnanca dad Andeer vegn approvà.
  • Arosa: A la vischnanca dad Arosa vegn garantida ina contribuziun da maximalmain 120 500 francs per construir da nov il stabiliment d'allontanament da l'aua da la glitta surabundanta da la serenera dad Arosa.
  • Bravuogn: Il "Plan da las zonas da protecziun per la funtauna d'aua minerala Alvra a Bravuogn" ed il "Reglament per las zonas da protecziun per la funtauna Alvra da la vischnanca da Bravuogn", tuts dus relaschads da la suprastanza communala da Bravuogn ils 5 da favrer 2013, vegnan approvads.
  • Jenaz: Las revisiuns parzialas da la constituziun communala da la vischnanca da Jenaz dals 28 november 2012 e dals 13 da zercladur 2013 vegnan approvadas. Il motiv per l'ultima revisiun da la constituziun è stà l'introducziun dal dretg da votar en chaussas communalas per persunas estras domiciliadas.
  • Val Stussavgia: Als custs supplementars da la 10. etappa da la meglieraziun generala da Camana vegn garantida ina contribuziun chantunala da maximalmain 11 600 francs. Premess vegn il pajament da la contribuziun federala.

Contribuziuns chantunalas a differentas instituziuns 
  • Servetschs psichiatrics dal Grischun: La contribuziun a l'instituziun responsabla dals servetschs psichiatrics dal Grischun importa 194 207 francs per l'onn 2012.

Gremi: regenza
Funtauna: rg chanzlia chantunala dal Grischun
Neuer Artikel