Zum Seiteninhalt

La dretgira administrativa refusa ils recurs cunter la fusiun d'Arosa

  • Erste Mitteilung
  • Neuen Beitrag einfügen
Cun satisfacziun ha la regenza prendì enconuschientscha dal fatg che la dretgira administrativa dal chantun Grischun ha refusà cun la sentenzia dals 3 da settember 2013 il recurs constituziunal ed il recurs cunter il dretg da votar ch'èn vegnids inoltrads cunter la fusiun d'Arosa, Calfreisen, Castiel, Langwies, Lüen, Molinis, Peist e St. Peter-Pagig a la vischnanca d'Arosa. 

Object dal recurs
Ils recurrents han contestà particularmain ch'ina radunanza communala constitutiva haja – suenter ch'il contract da fusiun è vegnì acceptà – votà davart la constituziun communala da la nova vischnanca d'Arosa. Tenor lur opiniun avess la constituziun communala stuì vegnir approvada da mintga singula vischnanca. La disposiziun dal contract da fusiun che cuntegneva la procedura respectiva e ch'è vegnida approvada da la regenza han ils recurrents resguardà sco cuntravenziun cunter la constituziun e cunter la lescha. Els han pretendì che mintga singula vischnanca haja da votar – ultra davart l'approvaziun dal contract da fusiun – er anc davart l'approvaziun da la constituziun. Pervia dal modus da votaziun applitgà sajan las votantas ed ils votants da las vischnancas pitschnas vegnids maiorisads da las votantas e dals votants d'Arosa sco vischnanca la pli gronda. 

Cuntegn da la sentenzia
La dretgira administrativa ha constatà che la procedura grischuna da fusiun na cuntrafetschia ni al dretg constituziunal ni al dretg chantunal. La libertad d'agir ch'il legislatur dettia a las vischnancas concernent la procedura prendia resguard da l'autonomia communala che ha ina gronda impurtanza en il Grischun. Las votantas ed ils votants hajan gì occasiun avunda avant la votaziun da fusiun da sa far in maletg cler da la nova vischnanca futura. Tenor l'opiniun da la dretgira administrativa è ultra da quai d'impurtanza centrala che la protecziun da las minoritads saja vegnida resguardada adequatamain. 

Impurtanza da la sentenzia
Igl è stà l'emprima giada che la procedura grischuna da fusiun è stada l'object d'ina procedura giudiziala. Cun satisfacziun prenda la regenza enconuschientscha dal fatg che la sentenzia na lascha nagins dubis vi da la legalitad da la procedura da fusiun che vegn applitgada dapi decennis. In basegn d'agir legislativ en quest connex n'è pia betg avant maun. En vista a l'impurtanza democratica ed a l'impurtanza da las dumondas giuridicas che sa tschentan en connex cun la fusiun contestada ha la dretgira desistì excepziunalmain d'adossar ils custs da dretgira als recurrents perdents.

La sentenzia n'ha anc betg vigur legala; cunter ella poi vegnir recurrì tar il tribunal federal entaifer 30 dis. 
 

Infurmaziuns:
- cussegliera guvernativa Barbara Janom Steiner, scheffa dal departament da finanzas e vischnancas, tel. 081 257 32 01, e-mail: barbara.janom@dfg.gr.ch  
- Thomas Kollegger, manader da l'uffizi da vischnancas, tel. 081 257 23 81, e-mail: thomas.kollegger@afg.gr.ch  
 

Gremi: regenza
Funtauna: rg chanzlia chantunala dal Grischun
Neuer Artikel